KAPIN sa P2 milyunes nga balor sa ilegal nga drugas ang nasakmit sa kapulisan sa dakbayan sa Sugbo sa managlahing operasyon sa drugas sa dakbayan.
Sa alas 3:00 sa hapon niadtong Miyerkules, Agusto 21, duha ang nasikop sa gilusad nga buy-bust sa mga sakop sa Mambaling Police Station sa Sitio Huyong-huyong, Barangay Mambaling.
Ang mga nadakpan mao sila si Jason Lendio Yuson, 25, ug Eldred Ylqya Dinoy, 30, pulos nagpuyo sa maong lugar.
Nakuhaan sila og 50.18 grams nga gituohang shabu nga mobalor og P341,224.
Ang duha pulos nalakip sa watchlist sa Mambaling Police Station nga high value targets ug taudtaod na nga gi-monitor sa Cebu City Police Office (CCPO).
Samtang sa Pardo, laing drugas nga mobalor sa P500,000 ang nasakmit sa kapulisan gikan sa usa ka 41 anyos nga pintor sa Sitio Kabayoan, Barangay Inayawan, alas 2:30 sa kaadlawon kagahapon, Huwebes, Agusto 22, 2019.
Nangulo sa operasyon ang hepe mismo sa Pardo Station nga si Police Major John Karen Escober.
Ang nadakpan nga nakuhaan og 80 gramos mao si Bonjie Yap Tillo alyas “Budok” nga nag puyo ra usab sa maong lugar.
Mga pinakete sa gituohang shabu nga gisulod sa puwa nga pouch nga mokantidad ang tanan og P544,000.
Nalakip si Budok sa watchlist sa Pardo Police ug nabutang sa high value target sa CCPO diin migawas ang iyang pangalan sa ubang dakop sa Pardo ug gitug-an usab sa CCPO hotline.
Sakop siya sa usa ka dakong drug group.
Matod ni Police Major Escober nga mitug-an kanila si alyas “Budok” nga usa ka Ruben Carin nga naa sa sulod sa Cebu City Jail ang mo-supply niya og ilegal nga drugas.
Ang halin sa shabu nga iyang mabaligya kuhaon sa tawo ni Carin ug hatagan usab siya og tag 100 grams matag semana.
“Ang iyang ingun nga hatdan lang daw siyag shabu unya ang halin naay mokuha nga tawo daw anang Ruben Carin nga naa sa sulod sa jail," matod ni Escober.
Nadakpan na sa Pardo police station si Carin niadtong miaging tuig nga giingong maka baligya og usa ka kilo matag semana bisan pa man nga naa na kini sa bilangoan.
Samtang, moabot og P1.3 milyunes nga balor sa drugas ang nakuha sa mga sakop sa City Intelligence Branch sa CCPO atol sa buy bust sa Sitio Lawis, Barangay Pasil, alas 3:27 gahapon sa hapon, Huwebes, Agusto 22.
Ang nadakpan giila nga si Jovan Tajanlangit Inot, 24, molupyo sa Pasil nga nakuhaan og tulo ka dagkong pakete ug usa ka gamayng pekete nga gituohang shabu nga motimbang 205 gramos.
Matod ni Police Major Randy Caballes, hepe sa Criminal Intelligence and Investigation Bureau (CIIB), ang ilang nasikop naa sa watchlist sa CCPO ug high value target regional level. (AYB)