KAPIN sa usa ka kilo sa gituohang shabu ang nakuha ug upat ka mga drug personalities ang giposasan sa mga sakop sa Labangon Police Station atol sa buy-bust operation sa Sitio Viking, Barangay Mambaling, Dakbayan sa Sugbo alas 12:30 sa kaadlawon, Biyernes, Agusto 23, 2019.
Ang maong ronda gipangulohan ni Police Major Henrix Bancoleta, hepe sa Labangon Police Station, nga gi-supervise ni Cebu City Police Office director Police Colonel Gemma Vinluan.
Ang mga nadakpan mao silang Benerando Avistado Gemperoso Jr. alyas “Junjun”, 27, ug ang maguwang niini nga si Joven Avistado Gemperoso, 29, usa ka beautician, nga pulos high-value target. Nadakpan pud silang Beverly Gemperoso Medina, 26, ug Regie Logico Medina, 29, assistant cook nga pulos nagpuyo sa Sitio Viking, Barangay Mambaling.
Nakuha sa mga dinakpan ang 53 ka dagkong putos ug laing usa ka labing dako nga putos sa gidudahang shabu nga motimbang sa 1.35 kilos nga mobalor ang tanan sa P9.1 million.
Ang mga dinakpan moatubang sa kasong kalapasan sa Republic Act 9165, o ang Comprehensive Dangerous Drugs Act of 2002. (Superbalita Cebu)