WA pa mailhing lalake nga gituohang gi-salvage napalgan sa may Purok 7, Barangay Bunga, siyudad sa Toledo, pasado alas 7 sa Huwebes sa buntag, Disyembre 6.
Ang lalake adunay mga samad pinusilan sa nagkadaiyang bahin sa lawas.
Gibana-bana nga aduna kini gitas-on nga 5’2,” adunay tattoo sa walang bukton sa ngalan ni Samantha ug nawong sa bata sa tuong bukton.
Gituohan sa kapulisan sa syudad sa Toledo nga gilabay lang sa dapit ang lawas sanglit wa makadungog og buto sa armas ang mga residente.
Niadtong Miyerkules sa gabii, Disyembre 5, adunay sakyanan nga gituohan nga gikan sa Barangay Das ang giingong nakit-an nga nihunong sa dapit diin napalgan ang lawas. AYB