ERLANDO LIGAN MAJAN
Brgy. Hipodromo, Cebu City
Makigbuwag ka kanako?
Simbako, ipahilayo!
Ngano man gyud nga makigbuwag ka nako?
Tan-awa ang pula mong mga ngabil
Ania mipilit sa akong mga aping.
Gibilanggo mo ako sa imong mga damgo.
Saba diha, uy!
Katiguwang na nato.
Ayaw na diha pagbinata.
Di man sab nga magpakatiguwang lang gyud.
Sikit lang diri, kapyot sa akong bukton,
Manglakaw ta nga way sungkod.
Tuyhad lang, tutoki ang dalan aron di ta mapandol.
Dali na. Pag-amping god. Mapandol man gani
Ang kabaw nga upat ang mga tiil.
Hinayhinay lang god ta. Moabot ra ta
Sa atong panahon.
Ako ang anino mo. Timan-i na.
Dili ta magbuwag. Tana, uy!