MOPARADA og 330 ka mga atleta ang Cebu City Niños alang sa kampanya niini sa 2019 Batang Pinoy National Championships nga mosugod karong Agusto 25 sa Puerto Princesa, Palawan.
Ang Niños gikonsiderar nga usa sa labing lig-ong puwersa sa kompetisyon nga giorganisar sa Philippines Sports Commission (PSC) alang sa batan-ong mga atleta nga nag-edad og 15 anyos ug paubos.
Ang Niños miangkon sa second overall sa Batang Pinoy Regional Qualifiers sunod sa host Iloilo City niadtong Marso.
“Whatever the outcome, Cebu City (delegation) will give our best to bring home a meaningful victory,” matod ni Cebu City Sports Commission (CCSC) chairman Edward Hayco sa interbyu sa Sun.Star Cebu.
Ang Niños makigparang og 233 local government units sa inilugay sa overall title. Sa kinatibuk-an, dul-an sa 10,000 ka mga atleta, coaches, ug technical officials ang nahilambigit sa kompetisyon.
Gawas sa Niños, ang Talisay City, Mandaue City, Lapu-Lapu City ug Cebu Province mao ang laing mga puwersa gikan sa Sugbo nga mohamag sa kompetisyon.
Ang sporting events nga kombatihan mao ang triathlon, duathlon, cycling, baseball, men’s and women’s basketball, billiards, boxing, chess, dancesports, futsal, gymnastics, judo, karatedo, lawn tennis, muay thai, pencak silat, rugby football, sepak takraw, softball, soft tennis, swimming, table tennis, taekwondo, volleyball, weightlifting, wrestling ug wushu. (RSC, ESL)