DEPENSAAN ni Johnriel Casimero ang iyang interim World Boxing Organization (WBO) bantamweight title karong gabii batok kang Mexican challenger Cesar Ramirez sa San Andres Sports Complex sa Manila.
Sa official weigh-in kagahapon, si Casimero pakyas sa pagkuha sa weight limit nga 118 pounds sa premiro niyang pagtunob sa timbangan.
Ang lumad nga taga Ormoc City, kinsa naghashas sa iyang abilidad boksing dinhi sa Sugbo, nitali og 118.8 pounds sa premirong pagtimbang kaniya.
Hinuon human sa duha ka mga oras nga pagpaus-os og timbang, nihaom na si Casimero sa weight limit.
Tinguha ni Casimero nga makaposte og dalaygong kadaugan ning awaya aron makabaton og kahigayunan nga makakontra sa mas bantugang mga boksidor.
Kon molampos siya ning awaya, pangandoy ni Casimero nga makigbatok kang WBO bantamweight regular champion Zolani Tete.
Nakuha ni Casimero ang iyang interim title pinaagi sa 12th round knockout nga kadaugan batok kang Ricardo Franco niadtong Abril 20.
Si Casimero, kinsa usa ka three-division world champion, adunay 27-4, 18KOs nga rekord samtang si Ramirez naghupot og 18-3, 11KOs nga baraha. (EKA, ESL)