ARON ipadayag ang iyang suporta, personal nga mosaksi si President Rodrigo Duterte sa premirong duwa sa Gilas Pilipinas sa 2019 FIBA Basketball World Cup nga sugdan karong Agusto 31 sa Foshan, China.
Mao kini ang gibutyag ni Department of Foreign Affairs (DFA) Assistant Secretary Meynardo Montealegre nga napatik sa www.abs-cbnnews.com.
Ang Gilas Pilipinas makigbatok sa Italy alang sa nag-una nilang tahas sa matag upat ka mga tuig nga kompetisyon.
Mokuyog ni Duterte sa pagtan-aw sa duwa mao si Chinese Vice President Wang Qishan.
Sa sayo pa, si Duterte nihatag na og panahom kabahin ning duwaa diin dayag siyang miingon nga wala’y dag-anan ang Gilas Pilipinas batok sa Italy.
Hinuon nagtuo si Duterte nga posibleng modaog ang Gilas Pilipinas batok sa Angola sa katapusan niining tahas sa group elimination stage.
Si Chief of Presidential Protocol Robert Eric Borje nagkanayon nga ihan-ay ang panagtagbo ni Duterte ug sa mga sakop sa Gilas Pilipinas.
“That’s something that we’re working on. But what’s definite is the President, of course, wants to support Team Philippines,” matod pa ni Borje.
Gawas sa Italy ug Angola, ang laing makontra sa Gilas Pilipinas sa group elimination mao ang Serbia.
Ang Team Pilipinas, nga naa sa ika-31 sa world rankings, nagkinahanglang makasulod sa top two sa group elimination aron makaabante sa 2nd round.
Gawas sa iyang pagsaksi sa duwa sa Gilas, si Duterte makighugpong sab sa presidente sa China nga si Xi Jinping.
Ang Gilas Pilipinas mokombati sa kompetisyon nga wala si National Basketball Association (NBA) Fil-Am star Jordan Clarkson.
Ang Samahang Basketbol ng Pilipinas (SBP) mihangyo sa FIBA paduwaon si Clarkson sa Gilas isip usa ka lokal nga magduduwa apan wala kini tugoti tungod kay wala nakakuha si Clarkson og Philippine passport sa wala pa kini nag-16 anyos.
Sa text massage nga iyang gipadangat sa ABS-CBN, nagkanayon ang amahan ni Clarkson nga si Mark nga ang kinatibuk-an nilang pamilya mosuporta sa kampanya sa Gilas Pilipinas bisan wala ang iyang anak.
“I’m looking forward to watching them go to work! The entire Clarkson family will be there in spirit rooting for them to come out victorious,” text message ni Mark.
Si Clarkson, kinsa usa sa mga pambato sa Cleveland Cavaliers sa National Basketball Association (NBA), naghinamhinam untang morepresentar sa Pilipinas apan wala motugot ang kahigayunan. (ESL)