ANG nakalabay nga mga adlaw giduslitan og mga kahingawa ug kagul-anan sa mga tawo nga nagtamod sa kinabuhi sa mga binuhat nga nahimo na nilang kabahin sa nga sa kalit lang mawala.
Daw og sa di ko katoo nga si Ma’am Gina Lopez nitaliwan na sa laing kalibutan. Nakaingon ko nga pagka anugon. Sayod tang tanan kong unsa siya ka malampuson sa daghang programa nga iyang gipasiugdahan - pagpanalipod sa kalikupan.
Tinuod daghan ang nisupak lakip na sa ubang mga sapian ug mga inpluwensadong mga tawo sa katilingban, apan wa kini makapalugak sa iyang baruganan. Wa pa ni labot sa iyang mga programa pagtabang sa mga biktima sa katalagman. Una nakong naila-ila si Ma’am Gina, wa pa koy usa ka tuig nga nag-alagad sa ABS CBN Cebu.
Talagsaon to nga kahigayonan nga personal nako siya nga nahimamat ug naestorya nga wa gyuy labot ang akong trabaho sa newsroom. Dunay gimbuhaton niadtong panahona nga niboluntaryo ko sa pagtrabaho. Human nga siya akong nahinabi sa telepono pinaagi sa long distance, nagkita mi personal ug nagka estoryai sa airport sa Manila.
Wa gani ko magtoo nga iyaha ko nga dapiton sa ilang pinuy-anan sa Ayala Alabang. Didto akong nasinati ang talagsaon niya nga hiyas sa pagka mapahiubsanon nga di gyud nako makalimtan hangtod sa hangtod.
Ang iyang mga lihok nga daw way kaluya, ako na sab na nga naobserbahan didto.
Ang iyang tinagdan sa mga katabang sa panimalay, way sama Ang pulong nga “paki” nga sa ato pa, palihug maoy kanunay nakong madunggan kong duna siyay tuyo sa mga katabang didto. Sa hilom nakaingon ko, labihang lapara og kasing kasing kining maong tawo nga paglabay sa katuigan naka kulit og pangalan sa natad sa pagpanalipod sa kinaiyahan ug naghatag og paglaum ilabi na niadtong mga biktima sa katalagman.
Pahulay sa dayon Ma’am Gina.
***
Ang laing masulob-on nga balita mao ang pagtaliwan ni Sir Erning Lariosa. Wa pa ko magsulat dinhi sa Super Balita, daan na nako siyang kaila. Kini tungod kay ang iyang agaw ug pag-umangkon ako man sab nga mga kauban kaniadto sa nagbasi pa ang ABS CBN Cebu.Gani sa dihang padung nako nga mosugod pagsulat sa atong Asoy pinaagi sa pag giya ni Atty. Pachico Seares, si Sir Erning ang kanunay nga naghatag og mga paagi unsaon nako pagpalambo ang akong mga sinulat. Salamat Sir Erning sa imong kaayo.
Wa sab nato damha ang kalit nga kamatayon ni Talisay City Councilor Julian Daan. Di pa gyud kaayo dugay namo nga gihisgutan ang kinabuhi sa tawo nga naila sab sa pangalan nga Teban Escudero. Wa mi magkauban og estasyonan ni Teban pero di sab maihap ang mga higayon nga magka kita mi og mag-estorya nga daw kami rang kaubana. Ingon ana kaaghop ang iyang kasingkasing. Di mopili kauban o dili sa estasyonan nga iyang gialagaran. Ma radyo ug politika kanunayng number one. Rest in Peace Konsehal Teban.