BATI ang taras ni Mayor Tomas Osmeña gikan sa iyang paglingkod sa katungdanan hangtod nga gihukasan sa gahom. Nagbilin og mga lama. Kadtong gipamawian og sakyanan ang mga kapitan nga wala mopaluyo. Gisungay ang kapolisan. Gipasirhan ang mga establisamento kansang mga tag-iya wala mohabig. Gipanglutos ang wala magustohi nga mga negosyante. Ang pagkamaginukdanon maoy naghatod sa kapildihan. Makaguba sa imahen lisod papason.
Sa sayo pa gilansangan ang SRP nga siya ray makabaligya sa 295 ektarya pinaagi sa resolusyon sa konseho. Unang gipasulod nga investor si Michael Gleisner sa Bigfoot, 10 ka ektarya sa Filinvest, 40 ektarya joint venture tali sa Filinvest ug 30 ektarya sa SM Seaside City. Gani gusto ni Osmeña nga idiskasi ang 45.2 ektarya nga nabaligya ni kanhi Mayor Mike Rama ngadto sa SM, Ayala ug Filinvest. Dugangan pa sa pagpaguba sa Sugbo ug Senior citizens building sa Kawit Island nga wala mohatag og clearance ang COA subay sa Circular No. 89-296 nga naglatid sa proseso kabahin sa paggun-ob sa propyedad sa gobyerno.
Tungod sa kaparotan sa politika iyang gihimolbolan ang iyang opisina sa ikawalong andana sa city hall. Ingon og nagsalimoang sa kapildihan. Giukal ang tiles, inidoro, lababo ug gilangkat ang kisame. Gipamutol ang linya sa korente ug tubig. Gitilok paghakot ang mga butang ug dayan-dayan. Giingong nahanaw ang selyo sa mayor. Nangatarongan nga kaugalingong kwarta ug donasyon nga 2M pesos gikan sa iyang mga higala ang gigasto sa opisina human wala hatagi og gahin sa konseho. Ubos sa balaod gidid-an ang mga opisyal sa pagdawat og donasyon. Sa 2012 nagsagubang og kaso si Osmeña sa Ombudsman kadtong iyang pagdawat sa duha ka mahalong awto gikan sa Bigfoot. Nahinomdoman kadtong pagtikwang ug pagyatak-yatak ni Osmeña sa gitindang barbeque sa sidewalk sa Lahug. Mao sab ang gihimo ni Konsehal Mary Ann delos Santos nga running mate ni Osmeña apan dili kaayo grabi ang gipangibot sa iyang opisina. Kaniadto gitahasan si delos Santos sa pagpabungkag sa CCMC nangawala ang mga kabilya ug ubang mga gamit.
City legal office misang-at og kasong kriminal ug administratiba ngadto sa Ombudsman batok ni Osmeña ug 45 ka mga tawo. Kalapasan sa Article 308 sa Revised Penal Code ug Anti Graft and Corrupt Practices (RA 3019), theft, malicious mischief, paglapas sa Code of Conduct and Ethical Standards (RA 6713). Dili man gani masilotan apan gikonbikto sa katawhan ang gibilin nga mga lama. Hinoon si Osmeña nagbilin og dakong tampo sa ting-usbawan nga mao ang kaugmaran sa SRP ug ang umaabot BRT. (csa_1156@yahoo.com / 09064648954)