NAPAKYAS ang konseho sa dakbayan sa Lapu-Lapu sa pag override sa veto ni Lapu-Lapu City Mayor Junard “Ahong” Chan sa ordinansahon nga gipalabang sa konseho sa panginahanglan una og approval sa Sangguniang Panlungsod ni bisan kinsa nga molukat og business ug developmental permit alang sa mga foreshore land kun baybayon sa dakbayan.
Usa na lang unta ka boto ang kuwang aron makuha sa oposisyon ang numero.
Si Konsehal Rico Amores, chairman sa committee on environment, maoy nangamahan sa ordinansa.
Aron unta ma override ang veto sa mayor, nagkinahanglan ang konseho og 2/3 votes sa kinatibuk-ang miyembro sa SP mga moabot og 14.
Ang 12 niini pinili samtang ang duha mga ex-officio member.
Buot pasabot, 10 sa 14 ka mga miyembro ang kinahanglang mouyon sa pag-override.
Apan atol sa botasyon, siyam lang ka mga konsehal ang niuyon sa pag-override.
Ang siyam naglakip nila ni Konsehal Rico Amores, Flaviano Hiyas, Rudy Potot, Junrey Gestopa, Queenie Malingin-Amman, Marcial Ycong, Rex Mangubat, Eduardo Cuizon ug Joe Dungog.
Ang maong mga konsehal naila nga mga kaalyado sa mga Radaza nga higpit nga karibal ni Chan sa politika.
Ang Sangguniang Kabataan (SK) president ug ex-officio member nga si Laika Tampus mi-abstain. Samtang ang wa mouyon mao sila Konsehal Janvi Dela Serna, Nelson Yap, Efren Herrera ug Gregorio Paquibot Jr.
Si Dela Serna ug Yap naila nga mga kaalyado ni Chan.
Gumikan sa kapakyas sa konseho sa pag-override sa veto ni Chan, wa nay bili ug di na maimplementar ang ordinansa, sumala pa ni Amores.
Dihang gipangutana kon nagdahom ba siya nga dili nila ma-override ang veto ni Chan gumikan kay mayoriya sa konseho dili man unta kaalyado sa mayor, kini ang tubag sa konsehal: “Okay lang. Normal ra na. Way problema na kay part na sa parliamentary procedure,” matod ni Amores.
Sila si Paquibot, Herrera ug Tampus kaalyado unta sa mga Radaza apan pulos wa mobotar sa pag-override. Nagdumili na paghatag og spekulasyon si Amores kalabot sa nakab-ot nga desisyon sa tulo ka mga kauban sa konseho sanglit ilang katungod ang ilang gibuhat.
Si Chan ni-veto sa mao nga ordinansahon tungod kay iyang nakita nga di kini maayo sa sektor sa negusyo kay nagdugang kini og kadugay sa paghikay sa business permit.
Matod niya nasukwahi kini sa tumong sa administrasyon ni Presidente Rodrigo Duterte sa pagpapas sa mga transaksyon sa kagamhanan. (GCM)