Talisay magpatilaw sa inasal atol sa Pasigarbo

SUBLI na nga ipakita sa mga Talisaynon ang bongga nga Inasal Festival sa kadagahanan.

Dinhi magtuyok ang konsepto sa ilang contingent alang sa tigi sa Pasigarbo sa Sugbo karong Dominggo, Agusto 25.

Sa subli nga pagbalik sa Pasigarbo sa Sugbo, ang estorya sa ilang pasundayag naglibot sa pagpasalamat sa ilang patron, Sta. Teresa de Avila, matod ni Mikie Aznar, assistant tourism officer sa Talisay City.

Ang Pasigarbo sa Sugbo magpasundayag sa mga festival sa kalungsoran ug mga siyudad sa lalawigan sa Sugbo.

Matod ni Aznar nga makatilaw usab sa lamiang lechon sa Talisay ang mga manan-away karong Dominggo.

Moabot sa 200 ka kabataan ang naglangkob sa ilang contingent, kasagaran kanila lakip na ang mga propsmen, mga tinun-an sa Talisay City College.

Dul-an sa P2 milyones ang nagasto, ang P500,000 gikan sa Probinsya sa Sugbo.

Matod ni Aznar nga magsilbi na usab kini nga pasiuna nga preparasyon alang sa pagbalik na sa Inasal Festival nga naundang niadtong 2013.

Magsugod ang Panagtagbo Festival sa Dominggo, ala una sa hapon, Agusto 25, pinaagi sa parada. Adunay 44 ka mga contingent lukop probinsya sa Sugbo.

RE-ROUTING

Ang Cebu City Transportation Office (CCTO) nipahibawo sa ilang pagsirado sa N. Escario st., atubangan sa Cebu Provincial Capitol, ug Osmeña blvd., hangtod na sa Cebu City Sports Center.

Ang pagsirado magsugod sa alas 11 sa udto hangtod nga mahuman ang kalihukan.

Ang contingent assembly area anha sa right side portion sa Don Gil Garcia st./M. Velez st. padung sa Capitol area.

Ang props assembly Area anha sa tuong bahin sa Osmeña Blvd. (gikan sa eskina sa R.R. Landon st.), P. del Rosario st., J. Alcantara st. ug V. Rama Ave. nga mosangko sa Lucio Drive. (FMD & REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph