MITIUROK ang presyo sa durian sa Davao City, gumikan sa daghan niini nga suplay, busa hilabihan ang pagmaya sa Dabawenyo ug sa mga turista.
Matag eskena sa siyudad sa Davao dunay mga nagkatag nga durian, gipamaligya nalang sa tag P25-40 ang kilo, mag-depende sa variety niini.
Kung ang Dabawenyo ang pasultihon, puol nang kan-on ang durian sama karon nga ting-dagsa nga matakna sa pagsaulog sa Kadayawan Festival.
“Wa mi maglaum nga ang suplay sa durian ingon niini kadaghan. Unsay nahitabo mao nga kadaghanan sa negusyante nagpalit og dinaghan nga durian sa uma bisan og ang uban pang prutas wala pa mahinog tungod kay mas mahal kon moani pa og laing hugna. Moabot pa og laing 15 hangtud 20 ka adlaw human ang ani alang sa saktong kaguwang,” matud ni Davao Durian Industry Association Council secretary Manuel Villanueva.
Dugang niya, “If you could observe, the price is very low but the way I see it, most harvest really lack maturity that is why it may look good outside but not so much on the inside of the fruit.”
Dili lang prutas nga durian ang miubos ang presyo apan lakip na mga nag-unang prutas nga sagad mobunga atol sa Kadayawan.
Ang mangosteen naa sa tag P35/kg ngadto sa P40/kg; native lanzones naa sa P50/kg; seedless lanzones tag P80/kg; ug rambutan tag P25/kg ngadto sa P35/kg. Ang marang naa karon sa tag P35/kg diha sa palengke sa Bankerohan.
Matag tuig mabati gayod sa kadaghanan ang abunda nga ani nga gasa sa Kahitas-an ngari sa Davao City. Gasa sa Diyos nga kinahanglan ampingan ug di abusuhon ang kinaiyahan.
Magpasalamat kita sa Kahitas-an gumikan sa abunda nga ani nga nasinati karon sa mga Dabawenyo.