COTABATO CITY - Patay ang 5-anyos nga lalaki human napusilan og Hollen gun sa 7 anyos nga kaduwa alas 12:25 sa udto, Huwebes, Agosto 22.
Ang biktima giila nga si alyas Tuma samtang ang suspek mao ang iyang silingan nga si alyas Tahir, mga molupyo sa Parang, Maguindanao Province.
Matud ni Parang chief of police Lieutenant Colonel Ibrahim Jambiran nga nagdula-dula ang mga biktima kilid sa ilang balay gamit ang Hollen gun.
Apan nakablit sa 7 anyos ang gatilyo sa pusil hinungdan nga naigo sa ulo ang 5 anyos.
Daling gitabang ang bata sa iyang pamilya ug gihatud ngadto sa Parang District Hospital apan patay na dihang nahidangat.
Si alyas Tahir ang giluwas sa mga miyembro sa Barangay Peacekeeping Action Team (BPAT) ug gidala ngadto sa Parang Municipal Police Station.
Gikanayon ni Lieutenant Colonel Jambiran nga ila sab nga gitunol ang suspek sa Municipal Social Welfare and Development Office gumikan kay menor de edad.
Hinuon, nagkasabot ang pamilya sa suspek ug biktima nga aregluhon na lamang ang nahitabo. (Edgar E. Fuerzas)