SUPERBALITA CEBU

Magtiayon ‘utok sa scam’

DUHA na ang persons of interest sa Balamban Police Station sa pagpatay sa chief executive officer sa usa ka real estate company nga nagbase sa siyudad sa Davao nga nakaplagan sa Barangay Cansomoroy, lungsod sa Balamban, Sugbo.

Nakadawat usab og kasayuran ang kapulisan nga si Armando Oppus gigamit lang nga CEO sa pulis ug asawa niini sa pagpadagan sa double your money investment scheme.

Sila si Oppus ug iyang duha ka mga kaubang opisyal nga sila si Edmon Corona Quiñones sa finance ug Judy Ann Delatina-Estrella sa marketing, gipasakaan og kasong large-scale estafa sa Davao region.

Ang tulo maoy nailhang nipadagan sa Crowd Royals Real Estate Service nga nagbase sa Digos City, Davao del Sur.

Niadtong Hulyo 27, 2019, si Oppus ug iyang pamilya nahanaw dungan sa pulis ug asawa niini.

Giingong gigamit lang si Oppus sa magtiayon kay mao kini ang dunay linsensya sa pagka real estate broker.

Matod ni Police Major Christian Torres, hepe sa Balamban Police Station, nga sa ilang nakuha nga kasayuran, nag-uban sa pag-anhi sa Sugbo sila si Oppus ug ang usa ka babaye nga co-founder sa Crowd Royal.

Di pa usab nila mahinganlan ang magtiayon samtang wa pay kaso nga mapasaka ug nagpadayon pa ang imbestigasyon.

Matod ni Torres nga ilang nasayran gikan San Pedro Police Station nga wa moagi sa airport sila si Oppus ug mga kauban.

Nagtuo sila nga kon di barko ang gisakyan, hayan nag land trip kini.

Mas lisod silang masakpan kon tinud-anay nga nagdala og minilyong kwarta sa ilang pagsibat kon sila nag-land trip.

Dugang ni Torres nga ang maong pulis nagranggo pag patrolman, apan gihulagway sa mga kauban nga kwartahan na bisan sa kaubos pa sa iyang ranggo.

Gipangita ang magtiayon aron ipaubos sa imbestigasyon sanglit sila ra ang nasayod sa hitabo.

Giangkon ni Torres nga di pa matawag nga mga suspek ang magtiayon sa krimen tungod kay way nakakita sa panghitabo sa pagpatay.

“Possible nga sila base sa information namo sa Facebook. Daghan ang nag-inform nga silang kuyoga gikan sa Davao. Milayas kining bayhana, kanang co founder, awol nga pulis ug katong namatay dala ang kwarta,” matod ni Torres.

Nahinabi usab ni Torres ang hepe sa San Pedro Police Station sa Davao City Police Office nga human nibuto nga scam ang investment nga gipadagan nila ni Oppus, wala na mo-duty ang pulis.

Nigikan ang tulo sa Dakbayan sa Davao niadtong Hulyo 27 nga gikompermar usab sa hepe sa San Pedro Police Station.

Matod sa mga silingan nga wa na mopauli sa ilang balay si Oppus sa mao nga petsa sigun sa pamahayag sa mga silingan.

TAG-IYA SA SAKYANAN

Nasuta na usab sa Land Transportation Office (LTO) kinsa ang nanag-iya sa sports utility vehicle (SUV) nga gisunog sa Barangay Sunog, Balamban.

Nakarehistro kini sa ngalan sa usa ka langyaw, apan napalit na ni Oppus sa pag-abot niini sa Sugbo.

Wa motug-an si Torres kinsa ang ngalan sa langyaw tungod kay ila pa kining ipasubay sa LTO kon di ba kini “hot car” kun kinarnap.

Si Police Colonel Gemma Vinluan nipasalig nga motabang sila sa imbestigasyon uban ang Cebu Provincial Police Office.

Matod niya nga ilang tan-awon ang record ni Oppus.

Kon masuta nga naa sila dinhi sa siyudad sa Sugbo nag-abang og balay, ila kining ipaubos sa imbestigasyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph