Australia gipakaging sa RP team

NAKAPAGAWAS og maayong senyales ang Gilas Pilipinas kabahin sa ilang preparasyon sa nagkaduol nga 2019 FIBA Basketball World Cup pinaagi sa pagbuntog sa Australian squad Adelaide 36ers, 92-83, sa usa ka tune-up game niadtong Biyernes sa gabii sa Meralco gym.

Sa nahabiling kapin sa 4:00 ka mga minutos, ang Gilas Pilipinas mingpabulhot sa ilang opensa pinaagi sa 12-2 run nga gibuwakan og duha ka three-point shots sa Sugbuanong si Roger Pogoy.

Usa ka makapaukyab nga hansak ni Japeth Aguilar ang mituldok sa dalaygong kadaugan sa Gilas Pilipinas.

Sama sa gilauman, gipangulohan ni naturalized player Andray Blatche ang kadaugan sa Gilas Pilipinas pinaagi sa iyang 19 puntos, 18 rebounds ug siyam ka assists.

Si Aguilar nidugang og 17 puntos alang sa Gilas Pilipinas, nihatag og 12 puntos si CJ Perez samtang niamot og 10 puntos matag usa sila si Pogoy ug Paul Lee.

Grabe ka kuntento si Gilas Pilipinas coach Yeng Guiao sa iyang nasaksihan nga duwa sa iyang mga batos.

“The 36ers gave us a really good game. I felt that it was exactly what we needed. ‘Yun ‘yung talagang kailangan natin. Rugged, physical, playing against bigger guys,” matod ni Gilas Pilipinas coach Yeng Guiao nga napatik sa PBA.PH.

Ang Gilas Pilipinas ningkontrolar sa duwa sa sayong bahin ug nakaposte kini’g 25-16 nga labaw apan human niini, nakamugna ang mga Pinoy og sunodsunod nga turnovers nga maoy naghatag og kahigayunan sa Australians nga makagukod.

Grabe na kasikit ang kombati sa ikatulong quarter hangtod sa tungatungang bahin sa 4th quarter.

Nakaginhawa og luagluag ang Gilas Pilipinas dihang nakarehistro kini og 80-72 nga labaw sa nahabiling 7:38 minutos.

Human niini, ang Australians ningpasutoy og 9-0 nga rally aron ilugon ang labaw, 81-80, sa nahabiling 5:15 minutos.

Apan mao na kini ang katapusang higayon nga nakapanghudlat ang Australians gumikan kay sa nagsunod nga mga esena, nagmangtas na’g sugod si Pogoy.

Si Pogoy, kinsa lumad nga taga Talisay City, Cebu, nagpaboto og three-point bomb aron dugkatan ang 7-0 run sa Gilas Pilipinas nga naghatag kanila og 87-81 nga labaw.

Mitawag og timeout ang Australians human niini apan wala kini nakapabugnaw sa kainit sa mga kamot ni Pogoy ug nagpabuto na sab og laing three-point bomb ang kanhi sakop sa University of Cebu (UC) Baby Webmasters aron inaton ang labaw sa Gilas Pilipinas, 90-81.

Wala na nakabangon ang Australians human niini.

Puntos matag usa:

Gilas Pilipinas (92) - Blatche 19, Aguilar 17, Perez 12, Pogoy 10, Lee 10, Bolick 8, Almazan 7, Barroca 5, Fajardo 0, Norwood 0, Belga 0, Rosario 0

Adelaide 36ers (83) - Moore 16, Froling 11, Teys 10, Dillon 10, Taylor 9, Griffin 9, Kyei 8, Johnson 6, McVeigh 4, White 0, Harris 0, Drmic 0. Quarter-scoring: 25-16, 50-49, 73-68, 92-83. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph