TAGSATAGSANG mipugnit og kadaugan ang Batch 2005 Chameleons ug Batch 1998 Sipat sa managlahing division sa nagpadayong University of San Carlos North Alumni Basketball Club Cebu City Mayor’s Cup niadtong Biyernes sa USC North Campus gym, General Maxilom Avenue, Cebu City.
Ang Chameleons, ubos sa pagpangulo ni Jan Palos, mipatapsing sa Batch 2001 Builders, 61-58. Si Palos miyagyag og 20 puntos, unom ka rebounds, tulo ka assists ug upat ka steals nga igo na kaayong nakapahimo niyang best player of the game.
Ang Sipat squad, sa ilang bahin, mipugnit usab sa ilang unang daog pinaagi sa 92-88 nga pagpukan sa Batch 1995 Pirates sa Division I.
Si Cromwell Po maoy nahimong mahait nga puwersa sa Sipat human kini miugkat og 18 puntos, pito ka rebounds ug upat ka blocks.
Karong gabii, Agusto 25, upat ka mga paresan ang magkombati sa upat ka managlahing division sa mao gihapon nga dapit nga sugdan sa alas 4:30 sa hapon.
Ang Batch 1993 makigsangka sa Batch 1997 samtang magtakos usab ang Batch 2004 ug 2005 sa alas 6 sa gabii.
Ikaatbang usab sa Batch 1995 ang Batch 1999 sa alas 7:30 sa gabii ug sa main game magsangka ang Batch 2009 ug Batch 2015. (JBM)