SA PAKIGHIUSA, magkuyog tang tanan!
Kini ang gipanumpaan isip mga klasmeyt ug higala sa Batch 94 sa Don Sergio Osmeña Sr. National High School (DSOSNHS).
Karong 2019, ang batch 94 sa DSOSNHS nisaulog sa ika-25th ka tuig nga anibersaryo niini.
Sila nag-reunion nga gipahigayon sa social hall sa Barangay Labangon, Siyudad sa Sugbo niadtong April 28, 2019.
Ang kalihukan gipasiugdahan sa organizers sama nila ni Bernalin Dignos, Raquel Ceballos ug Rey Pacquiao uban sa suporta sa matag usa ka sakop sa batch.
Sa reunion, nagkahimamat ug naghangop ang matag usa nila nga dugay na nga wala magkakitaay sa taas nga katuigan gumikan kay nag-iyahay na og paningkamot ug panikaysikay alang sa matag pamilya.
Gihulagway ni Romeo Medequillo, usa mga sakop sa Batch 94, nga puno sa emosyon ang okasyon kay nag-abot ang suod nga mga higala nga kanhiay mga klasmeyt. Mga buhakhak ang nilanog sa social hall dihang ilang gihandum ang mga kaagi sa ilang pagtungha sa high school.
Dungan nga gisaw-an ang mga pagkaon nga gitampotampo sa mga nanambong.
Gipasalamatan ang organizers ug ang mga nanambong nga nahimo nga nagmalampuson ang kalihokan.
Alang sa batch 94, naglaom sila nga mag-abot gihapon ang ilang grupo sa mosunod nga 25 ka tuig ug lugwayan og taas nga katuigan ang ilang panaghiusa. (Alan Tangcawan)