TAGSA ra kaayo ang adlaw nga di ko makakita og disgrasya sa atoang mga karsada. Kadaghanan naglambigit og mga motorsiklo. Niadto lang Biyernes sa buntag, napasok sa likod sa sakyanan sa Special Weapons and Tactics (Swat) ang usa ka Yamaha Mio nga scooter. Unsaon, ang driver nga mikurbada, nagbulhotbulhot man. Nabangga ug napasok na hinuon siya.
Sa bisan asa nga blind curve, gikinahanglan nga mominor aron makapangandam kon dunay sakyanan nga ikasugat o nag-urong, duna pay panahon sa pag-brake. Maayo gani, wa siya maunsa, pero posibleng daku to siyag problema kay siya ang nakabangga sa sakyanan sa pulis nga igo rang niatras.
Naa say laing asawa nga nagpatabang nga magastuhan ang tiil sa iyang bana nga nabali. Nagmotorsiklo ang iyang bana dihang aksidenteng nabanggaan o nabangga sa usa ka sakyanan sa eskina gihapon. Mao lagi, wa gihapon momenor.
Bisan gani sa biseklita, di gani ko magpataka kaniadtog tindak. Momenor ko basta eskina kay di baya matag-an, naa say laing sakyanan nga kusog nagpadagan. Basta eskina gani,slow down intawon.
Duwa sa dan
Usa sa among problema kaniadto sa among mga night ride mao ang mga rider nga mag-exhibition og palayatlayat sa mga sidewalk. Manguyog man ni sila. Pero amo silang badlungon kay amo baya silang tulubagon kay kami ang organizer.
Bisan hangtod karon sa mga karsada sa Metro Cebu naa gihapoy panagsa nga naghimong playground ini. Wa sila maghuna-huna sa kakuyaw nga maigo sa liboan ka mga sakyanan nga nagsubay sa dan. Akoy makuyawan nga magtan-aw. Ambot, wa sab makabadlong nila ang ilang mga ginikanan. Kana kon nakahibawo ba sab sa ilang gibuhat.
Di usab ko entirely makabasol aning mga siklista kay wa intawoy pasilidad nato dinhi diin sila maka enhance sa ilang biking skills. Di baya ni mahal kaayo kon magtambayayong ang gobyerno ug pribadong sektor. Maayo ni i-develop kay naa ni sa Olympics ang mao nga sport.
Wa manumbaling
Diha ra ko makakita sa Barangay Lahug nga ang mga traffic sign wa tahura. Sa kadaghan sa mga no parking ug no stopping sign, gikan sa eskina sa JY padung sa Marco Polo, wa kini tahura sa mga sakyanan. Labaw na usab ang mga habalhanal driver nga nagpunsisok sa dapit, duol sa merkado sa barangay.
Wa pa ko kakita nga dunay operation ang Cebu City Transportation Office sa lugar. Basin wa lang ko makaatol.
Lain sab nga gipasagdan karon mao kining mga PUJ nga anha manghunong sa mga pedestrian lane. Common kaayo ni diha sa University of San Carlos sa Talamban. Wa ni badlunga sa mga pulis ug enforcers. Kanus-a lang nahimong jeepney stop ang pedestrian lane?