GIPANGHAMBOG karon ni Gennadiy “GGG” Golovkin nga ang gitakdang away niya kang Sergiy Derevyanchenko ikonsiderang “classic boxing”.
Magbinukbokay ang duruhang magkaribal alang sa panag-ilog sa bakanteng IBF world middleweight title sa Oktubre 5 sa Madison Square Garden sa New York nga giilang “mecca of boxing”.
Sa nahitabong press conference, gipaneguro nila Golovkin (39-1-1 35 KOs) ug Derevyanchenko (13-1 10 KOs) sa mga fans nga masulit ang pagsud-ong niini tungod lauman nga init nga binukbokay nga masaksihan gikan kanila.
Si Golovkin nga kanhi inila isip unified king tinguha nga mabakwi ang korona nga iyang gigunitan sulod sa tulo ka tuig.
Puntirya sa Kazakh star nga subling iluklok siya isip world champion sa 160 lbs ug makaatbang ang uban pang kuyaw nga kalabay sama ni Mexican superstar Canelo Alvarez.
“On October 5th it’s going to be a good fight. Every time I enter the ring, I try to give my fans the fight they want to see, the show they deserve. We will bring Big Drama Show back to the ring of @TheGarden & @DAZN_USA. See you in New York,” matud ni Golovkin sa usa ka pamahayag. (PR)