WALAY kabutangan sa kasadya sa mga Dabawenyo ug bisan sa mga bisita nga lokal ug mga turista human masaksihan ang Pamulak sa Kadayawan (Floral Float Parade) kagahapon.
Gikan pa niadtong miaging Sabado sa Indak-Indak sa Kadayawan, mabulukon na kini ug nadugangan kagahapon sa Pamulak nga maoy ulahing programa nga tipik sa ika-34 Kadayawan sa Dabaw.
Daghang mga bisita ang midayo sa siyudad nga maoy timaan sa malamboan nga ekonomiya ug turismo nga maoy bunga sa kalinaw ug panaghiusa.
Mismong si Davao City Vice Mayor Sebastian “Baste” Duterte ang misaksi sa kaugdahan diin usa-usa niyang gipanglamano ang mga bisita agi og pagpasalamat sa ilang pagduyog sa selebrasyon.
Ang City Tourism Office (CTO) ning siyudad dako ang pasalamat sa mga bisita human mas midoble ang mga bisita ning tuiga itandi sa milabay nga tuig.
“Mas marami ngayon, halos triple, fully-booked lahat ng mga hotels natin, thats why, ginawa nating for the following week ang Pamulak, para long talaga ang celebration na kung saan mabigyan ng mataas na oras ang ating mga bisita to know more at mag-enjoy sa Davao City,” tipik sa pahayag ni Generose Tecson, head sa CTO.
Makab-ot gayod ang tinuod nga kalamboan kay giubanan kini sa pagkamabinantayon sa katawhan ning siyudad.
Maghiusa kitang tanang tanan. Magpasalamat sa Kahitas-an sa abunda nga ani. Madayaw Dabaw!
