Binasi sa Isaias 66:18-21; Salmo 117; Hebreo 12:5-7, 11-13; Lucas 13:22-30
KAPIN kon kulang sa 400 ka gatos ka mga Sugboanon ang mitambong sa instalasyon ni Bishop Dennis Villarojo niadtong Agosto 21 didto sa Katedral sa Malolos, Bulacan. Nindot kaayo ang maong seremonya ug maayo kaayong pagkahan-ay sa mga Bulakenyo. Ang yugto nga labing nakapatandog mao ang paglingkod ni Nyor Dennis sa iyang lingkoranan. Gani ang “Cathedral” gikan sa pinulongang Griyego nga gipasabot “lingkoranan”. Simbolo kini sa awtoridad ug gahom sa obispo. Gihatod siya didto ni Cardinal Chito Tagle ug ni Arsobispo Gaccia, ang representante ni Papa Francisco sa Pilipinas. Si Cardinal Tagle isip Arsobispo sa Manila maoy mikabat sa Arsdyosesis sa Manila nga mao ang inahang simbahan sa Malolos.
May video nga gipasalida mahitungod sa kinabuhi ni Nyor Dennis. Seryosohon gyod ni siya nga pagkatawo. Hilumon. Kamanghoran. Maampuon. Dako ang iyang giagian nga pag-antos sa dihang namatay ang iyang amahan, usa ka adlaw pa lang siya nga giordinahan. Alang kaniya ang kinabuhi ka sunodsunod nga pagpanamilit.
Sa dihang gipangutana si Jesus kon “diyotay ra ba ang maluwas”, mitubag siya: “Padayon kamo pagpanlimbasog nga makasulod agi sa masigpit nga ganghaan”. Kining pulong “pagpanlimbasog” gikan sa Griyego. Milarawan kini sa pagpaugnat sa kusog diha sa pagbansaybansay sa usa ka atleta. Sington kini, mosakit ang lawas, madagma, ug magkadugo pa gani. Lisod ang pagpanlimbasog. Mao kini ang kinabuhi sa usa ka disipulo ni Jesus.
Wala mohatag og numero sa Jesus agig tubag sa pangutana kay ang iyang gipunting mao ang buhat sa pagpanlimbasog – nga usa ka buhat nga nagapadayon – ug dili ang si kinsa o pila ang maluwas. Kay kon nihatag pa siya og numero o mga ngalan, dili na kini sila manlimbasog ug wa nay manlimbasog.
Bisag wa hisgoti ni propeta Isaias ang pagpanlimbasog, nagpahipi kini sa maong mensahe. Usa sa bunga sa pagkagihinginlan mao ang pagtigom sa Dios sa tanang kanasoran didto sa Jerusalen. Bunga kini sa misteryosong gahom sa Dios nga mipadangat og dakong kaayohan diha sa iyang katawhan nga gihinginlan. Mabungahon diay ang pagpanlimbasog.
Namalandong usab ang sulat ngadto sa mga Hebreo nga nagkanayon: “Kon dili kamo disiplinahon...dili kamo nga anak kondili mga gipaangkan”. Modisiplina diay ang Ginoo ug dinhi makapanlimbasog kita. “Sa iyang panahon, ang tanang disiplina morag dili makahatag og kalipay hinunoa makapasakit, apan unya mopadangat kini og malinawong bunga sa pangkamatarong ngadto kanila nga nabansay niini,” nagpadayong ang maong sulat.
Daghang naagiang pagpanlimbasog si Nyor Dennis. Magpadayon pa gyod ni ilabina karon nga siya na ang obispo sa usa ka dyosesis. Kita usab nagpadayon og pagpanlimbasog kay ang patay ra ang dili manlimbasog. Mingawon ta niining batan-ong obispo bisan pa mag nalipay kita sa iyang bag-ong papel.
Kumusta ang atong pagpanlimbasog?