NAUNSA man sab kining si Sen. Bato dela Rosa nga magpataka man lang og lugar labi na niining isyu nga pagawson na sa Department of Justice (DOJ) si kanhi Calauan mayor Antonio Sanchez. Di man gyud angay hatagan og second chance kining konbiktado nga rapist ug murderer.
Unya, mag-ulbo-ulbo dayon sa kaspa dihang gipikhan sa usa ka student leader atol sa usa ka public hearing sa Senado.
Maayo pa si Senador Bong Go ug Presidente Rodrigo Duterte kay nibarug dayon nga di angay pagawson kining tawo nga gisilotag pipila ka mga life sentence.
Lalim bay nasakpan kining tawhana nga nagtago og shabu diha pa sa imahen sa mahal nga Birheng Maria. Subra pa ni sa amaw.
Alang kanako, mas maayo man nga madugta sulod sa prisohan kining ingon niini nga tawo kay sa patyon dayon. Mas maayong paantuson nga mahurot ang iyang kinabuhi sulod sa prisohan kay sa mamatay dayon. Di ba, dunay elemento sa kalooy alang sa kriminal kining patyon dayon.
Duna man ganiy uban diha nga mas mopili pang maghikog kay sa mag-antus sulod sa prisohan. Mas mopili sila sa kinabuhi sa imperno nga walay katapusan kay sa matanggong sa prisohan hangtod mamatay bisan pag dunay telebisyon ug aircon ang ilang selda.
Academic Freedom
Daghan kaayo ang wala makasabot unsa kining giingon nga academic freedom ug nganong importante kini alang sa atong mga tunghaan.
Misyon man gud sa mga tunghaan labi na sa usa ka demokrasya nga ang mga magtutudlo ug mga tinun-an nga makatudlo, makatuon, ug makagukod sa kahibalo ug research nga walay balda sa estado.
Bunga kining maong konsepto kay daghan kaayong masuko ug mogukod sa mga tinun-an ug mga magtutudlo nga maghisgot og mga kamatuoran nga sukwahi sa unsay gustong idikta sa kagamhanan.
Top Importers
Atong balikbalikan ang award nga gihatag sa kadagkuan sa Bureau of Customs sa Sugbo labi na si acting district Customs collector Charlito Mendoza sa miaging Agusto 16, 2019.
Ang top ten importers sa Port of Cebu mao ang Seaoil Philippines Inc., Steel Asia Manifactuing Corp., Ecossential Foods Corp., Kepco-SPC Power Corporation, Joyland Industries Corp., Cebu Energy Development Corp., Apo Cement Corporation, Taiheiyo Cement Philippines Inc., Cagayan Corn Products Corporation, ug ang Cebu Oversea Hardware Co. Inc.
Ang top 3 importers sa Mactan mao ang Panay Energy Development Corp., MOreta Shipping Lines Inc., General Electronic Phils. Inc.
Sa Dumaguete, ang top four importers mao ang: Filoil Logistics Corp., Wilmar Edible Oils, Phils. Inc. Pryce gases Inc. ug ang Primary Trident Marine Solutions Inc. (@anol_cebu sa Twitter)