USA ka dakong kalihukan ang mahitabo karong adlawa dinhi sa dakbayan sa Sugbo. Pinasiugdahan sa Kagamhanan sa Lalawigan sa Sugbo, ipahigayon ang Pasigarbo sa Sugbo o Festival of all Feativals. Tipik og kabahin gihapon kini sa usa ka buwan nga kalihukan nunot ika-450th ka founding anniversary sa lalawigan sa Sugbo.
Ala-Sinulog kini. Gani mas dako, engrande ug bongga pa sa Sinulog nga ipahigayon matag ikatulong Dominggo sa Enero dungan sa kapistahan sa Balaang Bata, Senyor Santo Nino. Nganong engrande man? Gumikan kay adunay 44 ka mga contingents gikan sa mga nagkalain-laing component cities ug mga munisipalidad sa lalawigan. Ang Sinulog mokabat lang sa mga 20 kapin ka mga contingents ang mosalmot gumikan sa kadako sa gasto.
Dugay na kining gipahigayon niadtong unang mga termino ni Gov. Gwen Garcia. Apan wala gipadayon sa unom ka tuig nga administrasyon ni Gob. Hilario Davide III kay alang niya wala kini pulos ug pag-usik-usik lang sa kuwarta sa mga magbubuhis. Kaugalingong gasto sa mga local government units (LGUs) nga mosalmot ning maong kalihukan. Hinoon, adunay gamay nga tabang gikan sa Lalawigan. Karon nga si Garcia na usab ang gobernador, iya nang gibalik.
Maayo baya kini kay dinhi man ma-highlight o ma-showcase ang partisipasyon sa matag lungsod sa lalawigan. Ilang mapaabot sa katawhan ang mga produkto o unsa man ang i-highlight sa ilang mga lugar sama sa mga local delicacies. Por hemplo, sa lungsod sa Liloan nga na-ilhan nga tighimo og rosquillos, ilang ipasundayag ang ‘Rosquillos Festival’. Ang Argao nga naila sa torta, magdala usab sa tema nga ‘Torta Festival’. Ug daghan pang uban.
Magsugod ang street dancing sa ala una sa hapon gikan sa Capitol grounds paingon sa Cebu City Sports Center subay sa Osmena Blvrd. Alas 6 na sa gabii sugdan ang showdown sa mga contingents didto sa stage sa Sports Center. Busa makapaabot kita nga maapektuhan ang dagan sa trapiko karong adlawa labi pa sa Osmeña blvd. Libre kini sa grandstand apan nanghatag sila og tickets aron ma-kontrolar ang mga tumatan-aw kay limitado ra man ang masulod sa grandstand. (bobbygnalzaro@gmail.com)