MGA mahiligon sa skateboarding sa Siyudad sa Talisay di na kinahanglan nga moadtog layo o sa mga karsada.
Nitugot na si Talisay City Mayor Gerald Anthony Gullas nga mahimong makagamit sulod sa compound sa Talisay City Hall ang grupo sa skateboarders sa Siyudad.
Alas 10 sa buntag hangtud sa alas 5 sa hapon matag Sabado ug Dominggo diha sa hawanan atubangan sa opisina sa Civil Service Commission (CSC) mahimo silang makaduwa.
Sugod sa Sabado, Agusto 24, gipagamit kini samtang wa usay abli ang mga buhatan sa City hall. Ang maong lugar sa weekdays gigamit nga parking area sa mga naay transaksyon sa City hall.
Ang mayor niingon nga temporaryo lang una kini kay gipangitaan pa usab niya og lugar nga mahimo nga mapraktisan kada adlaw.
Isip kini pagpakitag suporta sa bisan unsa nga klase sa sports, sama sa pagtukod unya og skatepark.
Una niini, ang batan-ong mayor nipahibawo nga sa iyang administrasyon ilang tagaan og pagtagad ang nagkalain-laing paugnat sa kusog lakip na niini ang extreme sports.
Dugang ni Gullas nga usa kini ka programa aron malingaw ang kabatan-onan ug malikay sa mga bisyo nga makadaot sa mga batan-on ug sa ilang kaugmaon.
Sa pagkakaron, ang Siyudad wala pay skatepark nga mahatag hinungdan nga ang mahiligon sa skate sa bisan asa nalang sa karsada makita.
Gawas sa extreme sports, posible nga maghimo sab si Gullas og liga alang sa mahiligon sa Mobile Legends, Dota ug uban pa.
Matod sa mayor nga ang maong mga matang sa kalingawan anam-anam na nga gidawat ug paagi usab kini nga magiyahan sila nga dili ra mahurot ang oras sa maong klase sa mga duwa.
Tinguha usab sa mayor ang pagpahigayon og sports summit.