DI MOMINOS P6.5 milyunes sa illegal drugs ang nasakmit sa kapulisan sa Dakbayan sa Sugbo sa managlahing mga operasyon.
Moabot og P4.5 million nga balor sa illegal nga drugas ang nakuha sa kapulisan sa buy-bust operation sa San Nicolas Police Station sa managlahing mga lugar ug oras Biyernes sa gabii, Agusto 23, ug alas 4 sa Sabado sa kaadlawon, Agusto 24.
Unang nadakpan alas 10 Biyernes sa gabii sa sitio Bato, Brgy. Ermita mao si Ludevico Villacorta Abadiez, alyas “Cocoy”, 39, nagpuyo sa maong lugar.
Nangulo sa buy-bust operation mao si Police Major Kenneth Paul Albotra.
Nakuha gikan kang Abadiez ang dagkong putos sa gituohang shabu nga motimbang og 520 gramos nga mobalor og P3,536,000 ug usa ka kalibre .45 nga pistola, magazine ug mga bala.
Giangkon ni Abadiez nga ihatod ra ang illegal nga drugas sa ilang balay.
Dunay laing tawo nga mokuha niini bugti sa P1,000.
Napugos siya sa pag dawat sa illegal nga drugas tungod sa kalisud sa panginabuhi.
Kanhi forklift operator si Abadiez apan niundang siya ug nagnegusyo nalang og piso net sa ilang balay.
Matod niya kuwang ang iyang kita sa ilang panginahanglan. Nihatag sa tanang mga impormasyon si Abadiez labot sa nag supply sa drugas kaniya.
Pagka alas 4 sa kaadlawon sa dalan L. Flores, Barangay Pasil, usa ka 33 anyos nga lalake nadakpan na usab sa buy-bust operation sa San Nicolas Police Station.
Nasikop mao si Jessie Chris Inoc Tura, kinsa nakuhaan og usa ka large pack ug upat ka medium packs sa gituohang shabu nga motimbang og 155 grams nga dunay Dangerous Drugs Board (DDB) value nga P1,054,000.
Matod ni Police Major Keneth Paul Albotra nga nalakip sa watchlist si Tura ug high value target sa regional level.
Nigawas usab ang ngalan ni Tura sa nangaging mga dakop diin siya ang gikuhaan og supply sa illegal nga drugas.
Apan hugot nga gihimakak ni Tura nga iyaha ang illegal nga drugas sanglit igo ra siya nga binlan bugti sa suhol nga P3,000 kon mahurot ang baligya.
Samtang duha ang nasikop sa buy-bust operation sa mga sakop sa Waterfront Police Station inabagan sa Police Drug Enforcement Group 7 sa Industry street sa Barangay Tejero alas 2:25 sa Sabado sa hapon, diin P2 million nga balor sa drugas.
Ang mga nadakpan mao silang Alvin Casili Barrientos, 38, taga Barangay Sangi, Minglanilla; ug Whimsey Bayang, 20, taga Banawa, Barangay Guadalupe, Dakbayan sa Sugbo.
Trese ka dagkong pakete sa gituohang shabu ang nakuha gikan sa duha nga motimbang og 300 grams nga mokantindad og P2,040,000.
Matod ni Police Major Joemar Pomarejos, hepe sa Waterfront Police Station, nga nalakip sa high value target regional level ang mga suspek.
Nakadawat silag impormasyon tulo ka mga semana na ang nakalabay sa illegal nga negosyo sa mga suspek sa Tejero hinungdan nga nagpatabang sila sa Drug Enforcement Group pag-monitor.
Human masuta nga namaligya kini, gilusad dayon ang buy bust operation nga niresulta sa pagkasikop sa duha.
Tungod sa pagkasakmit, mokabat na sa P89 milyunes ang balor sa illegal drugs nga nasakmit sa kapulisan 45 ka adlaw sukad milingkod sa katungdanan si Police Colonel Gemma Vinluan.
Matod niya nga daghan pa gihapon ang illegal nga drugas sa Siyudad sa Sugbo.
Siya nagtuo nga naa pa kini sa karsada hinungdan nga pakusgan pa nila ang operations.
“Malaki na ito. Hindi ito biro. Nakakalungkot isipin na ganito ka laki ang pumapasok sa Cebu City pero sa palagay ko hindi pa ito. Kumbaga sa iceberg, eh tip lang to,” matod ni Vinluan sa estorya sa mga tigbalita.
Patas-an pa sa kapulisan ang ilang intelligence monitoring ug miawhag sa publiko nga mo report kon adunay mabantayan nga namaligyag illegal nga drugas sa ilang barangay. (AYB)