NALIGO sa iyang dugo ug namatay diha-diha ang usa ka tigbantay nga nagsilbe usab nga cashier sa Miles Internet Café sa Sityo Abuno, Barangay Pajac, Dakbayan sa Lapu-Lapu human gitulis ug gipusil sa usa ka lalake sulod sa establisemento.
Giila ang biktima nga si Francis Jakosalem, 25, taga Barangay Labogon, Dakbayan sa Mandaue.
Tulis ang motibo nga gitan-aw sa kapulisan samtang duha ka mga suspek wa pa mailhi.
Sa pasiunang pakisusi sa kapulisan, pasado alas 11 na sa Biyernes dihang nagsumada si Jakosalem sa iyang kita kay padulong na usab siya manira.
Pipila ka minutos ang nakalabay, usa ka lalake nisulod sa internet cafe ug nidiretso pagduol sa counter.
Giingon nakaaksyon pa pagsukol si Jakosalem, apan gipusil dayon kuha sa kwarta.
Dunay samad pinusilan ang tuo nga bahin sa ulo ni Jakosalem. Di momenos P7,000 ang giingong nadala nga kwarta sa tulisan.
Wa pa hinuon matino kon unsa nga armas ang gigamit sanglit walay bisan usa nga kabhang ang nakita sa crime scene.
Ang imbestigador sa kaso, Police Corporal Mark Gallen Moralde, nitataw nga wa sila’y nakita nga anggulo nga posibleng dunay kasungi si Jakosalem.
Matod sa mga saksi nga suki sa internetan, buotan si Jakosalem ug way kaaway.
Duha ka mga lalake ang gituohang ningbuhat sa krimen.
Padayon pa ang pakisusi sa kapolisan alang sa pagkasikop sa duha.
Mag-atubang og kasong robbery ug homicide ang mga suspek kon sila madakpan.
Pahimangno sa kapulisan nga mas maayo nga maniguro ang mga tigpatigayon nga pamutangan og CCTV ang sulod ug gawas sa mga establesimento.
Kon mahimo, butangan usab og gwardya nga maoy mobantay sa kadudahan nga mga tawo nga dunay di maayong tuyo sa sulod.