DIGOS CITY -- Nag-ampo ang mga investors sa Crowd Royals Real Estate Services (CRRES) nga madakpan pa ang nahibiling duha ka suspek hayan mahibalik sab ang minilyong kwarta nga gidagit sa mga scammers.
Nagpabiling gawasnon ang misibat nga finance officer nga si Edmond Quiñones ug Judy Ann Delatina-Estrella, ang marketing staff kinsa asawa sab sa patrolman nga pulis kinsa wa na misipot sa iyang trabaho sa Davao City Police Office (DCPO) ubos sa Police Regional Office (PRO)-Davao region.
Nasayran nga ang gipatay nga si Armando Oppus, giplantilya lamang nga chief executive officer sa kompanya sanglit usa kini ka real estate broker.
Daghan sa mga investors gikan sa probinsya sa Davao del Sur ang naguol human natangag ang ilang kwarta.
Usa ka impormante sa SunStar Superbalita Davao nga mokabat sa P63-milyones ang ilang nadala gikan sa mga investors sa Davao del Sur lamang ug apil sa kinatibuk-ang kantidad nga P400 milyones.
Wa na magdahom ang usa sa mga investors nga si Clarita, 43, nga mabiktima sa mga scammers sanglit nindot ang gihanyag nga sistema sa kompanya diin mahimong makabaton og sakyanan, balay ug ubang kabtangan pinaagi sa paghatag og reservation fee nga di moubos sa P5,000.
Apan, sukad Hulyo 27, wa na igkita sila si Oppus, Estrella ug Quiñones ug apil sab nahanaw ang pamilya niini.
Giingong by land ang gihimong pagbiyahe sa mga suspek atol sa ilang pagsibat agi sa Cagayan de Oro City.
Human nahanaw ang mga suspek gipasakahan dayon kini og kasong large-scale estafa sa Siyudad sa Davao.
Sa kasamtangan, wa pa makuha sa punerarya didto sa Balamban, Cebu ang patay’ng lawas sa gisalvage nga si Oppus sanglit wa pa mopatim-aw ang iyang pamilya.
Nanghinaot sab ang mga investors nga madakpan na ang mga suspek aron manubag sa balaod sa ilang nahimo. (Orlando B. Dinoy)