DUHA ang namatay sa 24 ka mga nagka-tipdas sa Purok Gemelina sa Barangay Don Salvador Lopez sa Mati City, Davao Oriental, diin ang mga namatay pulos tag usa ka tuig.
Gikan pa niadtong ulahing semana sa Hulyo, nataho nga dunay kaso sa tipdas sa maong lugar diin sa 24 ka mga pasyente duha lang niini ang nadala sa ospital.
Sa 24 ka kaso, 22 niini giingong miyembro sa usa ka relihiyusong grupo kinsa giingong supak sila sa pagpatambal.
Ang City Health Office (CHO) nagtaho nga dunay 5,000 ka mga indibidwal ang nagpuyo sa nasampit nga barangay.
Moihap sa 483 ang nagpuyo sa Purok Gemelina diin 78 ka mga molupyo ang giingong sakop sa relihiyusong pundok.
Tungod niini, ang MGA CHO personnel nagpahigayon og immunization sa nasampit nga barangay niadtong Biyernes, Agusto 23, apan bisan usa ka miyembro sa maong religious group ang wala nagpa-immunize o nagpatambal.
Ang CHO sa Mati City nagpadayon sa pag-monitor sa apektado nga lugar aron dili mokatap ang maong impeksyon.
Anaa sa 5-anyos paubos ang sagad maigo sa maong virus, dili lamang sa Pilipinas apan sa tibuok kalibutan. (PR)