MAHUPTAN na sa hingpit ug magamit na sa mga Police Station sa Misamis Oriental ang body camera alang sa police operation labina ang pagpakigbatok sa kriminalidad.
Tumong ug tinguha aron mahatagan og katin-awan nga walay kasupakan nga nahimo ang mga kapulisan diha sa ilang mga operasyon nga sagad himoan og isyu labina adunay mga napatay nga suspek sa matag operasyon.
Matud ni Misamis Oriental Governor Bambi Emano nga ang iyang pamunoan mag apod-apod na og mga body camera sa dili madugay ngadto sa mga police station ug uban law enforcement unit sama sa Philippine Drug Agency (PDEA), National Bureau of Investigation (NBI) ug ubang special unit sa Misamis Oriental Police Provincial Office (Moppo)
Sulti sab niini nga atol sa Provincial Peace and Order Council (PPOC) meeting gi-check na nila ang sample sa duha ka mga body camera matag unit lakip ang model type niini.
“Tabang nato sa Kapitolyo sa atong kapulisan ang paghatag og duha ka body camera ila na gi-check ang model type kay naa na ang sample. Ganahan kaayo sila and we will be ordering it and hopefully by next PPOC meeting we will be giving to them,” matud ni Emano.
Butang sab nga gikalipay og dako ni Police Colonel Robert Roy Bahian ang provincial director sa Moppo.
Mapasalamaton kini sa suporta ni Emano sa kapulisan sa probinsya.