IPATUMAN sa tinugyanan sa Cagayan de Oro Police Office (Cocpo) ang signal jamming sa mga dagkong kalihukan sa Higalaay Festival 2019 sa Siyudad sa Cagayan de Oro.
Ang pagkawala sa signal lakip sa hugot nga seguridad nga gipatuman sa kapulisan alang sa malampuson, hapsay, ug malinawon nga kasaulogan sa kapistahan ni San Agustin.
Gibutyag ni Police Major Evan Viñas, tigpamaba sa Cocpo nga nahanaw ang signal sa mga dagkong kalihukan ilabi na sa mga parada.
"Yes street carnival parade, civic and float parade and procession, fluvial parade," matud ni Viñas.
Nasayran nga gipahigayon ang street carnival parade Domingo sa hapon, Agusto 25, 2019 samtang ang civic and float parade karong umaabot nga Agusto 27. Alas 4:00 sa buntag parade and procession samtang ang fluvial parade alas 9:00 sa gabii.
Nasayran nga sa mga nilabay nga tuig gipatuman usab ang signal jamming aron nga luwas ang tanang mga bisita ug Kagay-anon diha sa paglingaw-lingaw atol sa mga dagkong kalihukan.
Nagpahimangno usab ang kapulisan sa dili pagsul-ob og kalo, jacket, pagdala og payong ug mga dagkong bag.
Naghangyo usab ang kapulisan og pagsabot sa publiko tungod na usab kay alang lamang kini sa kaayuhan sa tanan.