SA TINGUHA nga dili maapektuhan ang kampanya sa ilang miyembrong teams, gipahibalo sa Maharlika Pilipinas Basketball League (MPBL) nga dili na nila tugtan nga makabalhin sa laing liga ang ilang mga magduduwa samtang nagpadayon ang ilang torneyo.
Nakadesisyon niini ang MPBL gumikan kay aduna sila’y mga magduduwa nga posibleng mahatagan og kahigayunan nga makaduwa og balik sa Philippine Basketball Association (PBA).
Ang lagda giisyu ni MPBL commissioner Kenneth Duremdes ug giaprubahan kini ni league founder Manny Pacquiao.
“Unfair rin naman sa mga teams na nagpalakas and nag-improve ng lineup nila, then all of a sudden iri-release lang agad. The best way is to finish the season before these players will be released to the PBA,” pasabot ni Duremdez sa Fox Sports Philippines.
Giklaro ni Duremdes nga wala sila'y intensyon nga babagan ang pangandoy sa ilang mga magduduwa apan kinahanglan nilang protektahan ang ilang miyembrong teams.
Ubay-ubay nga mga magduduwa sa MPBL ang gikan sa PBA nga naghuwat lang nga mahatagan og oportunidad nga makabalik sa PBA. (ESL)