NADEPENSAAN ni Johnriel “Quadro Alas” Casimero ang iyang interim World Boxing Organization (WBO) bantamweight title pinaagi sa brutal nga 10th round knockout nga kadaugan batok kang Mexican Cesar Ramirez niadtong Sabado sa gabii sa San Andres Sports Complex sa Manila.
Ang kadaugan nakapahayag sa tinguha ni Casimero nga maka-challenge kang regular WBO bantamweight champion Zolani Tete sa South Africa.
Gituohan nga mahitabo ang engkuwentro nila ni Casimero ug Tete sa dili pa mahuman kining tuiga.
Si Casimero, 30, kinsa kanhi world champion, mitumba nang daan ni Ramirez sa 3rd round pinaagi sa antimanong tuo nga kumo nga nakalusot human sa grabeng pagsinukliay og kumo sa duha ka mga boksidor.
Hinuon dali ra nga nakabangon si Ramirez niadtong higayuna ug makita nga dili ra kini tantong rugi.
Nakarehistro na sab og knockdown si Casimero sa 5th round apan mireklamo si Ramirez nga nawad-an lang siya og balanse niadtong higayuna.
Si Ramirez, 31, miagresibo sa 6th round ug iyang gitay-og ang kalibutan ni Casimero pinaagi sa makusog nga mga overhand nga tuong kumo.
Nasugakod ni Casimero ang maong ataki ni Ramirez ug human niini, ang trainer ni Casimero nga si Nonoy Neri nimando nga mosugod na’g ataki sa tiyan ni Ramirez.
“Sinabihan ko tama na muna sa mukha. Targetin na sa katawan kasi nakita ko bumibigay ‘yung Ramirez ‘pag tinatamaan sa katawan,” matod ni Neri sa interbyu sa www.abs-cbnnews.com.
Duha ka makusog nga tuong mga kumo ni Casimero sa 7th round ang nagpatumba kang Ramirez sa ikatulong higayon.
Sa 9th round, giataki na og grabe ni Casimero ang tiyan ni Ramirez.
“Pinilit n’ya nu’ng una sa mukha kasi sabi niya open palagi. Sabi ko sa 9th makinig naman siya sa akin, katawanin na niya. Buti naman nakinig,” dugang ni Neri.
Sa 10th round, usa ka antimanong tuo nga kumo ang miigo sa apapangig ni Ramirez hinungdan nga natumba kini nga pinahagba sa sawog.
Taodtaod pa una naulian sa saktong panimuot si Ramirez.
Gipasabot ni Casimero nga wala ra nakaapekto kaniya ang iyang pagka-overweight sa premiro niyang taak sa timbangan atol sa official weigh-in.
Nagkinahanglan pang magpaubos og timbang si Casimero sulod sa duha ka nga oras una niya nakuha ang weight limit nga 118 pounds.
“Wala namang epekto sa laban. Kung meron, konti lang pero hindi naman ako nagkulang sa ensayo kaya nakuha ko yung panalo,” pasabot ni Casimero.
Si Casimero, kinsa lumad nga taga Ormoc City, misaka sa 28-4, 19KOs nga rekord samtang si Ramirez nahagbong sa 18-4, 11 KOs nga baraha. (ESL)