Dear Papa Joe,
TAWAGA lang ko sa ngalan nga Avril, taga norte sa Cebu. Naa koy problema. Naa koy ka live in partner karon ug siya permi magluto sa among sud-anon kay ako fried ug instant foods ra akong kaya nga maluto. Usahay palpak pa kay masunog ang pretong itlog.
Gusto nako siya ma-impress sad nako bisan sa pagluto lang og sud-an or pag-atiman niya. Pero di siya mosugot nga mag lihok lihok ko kay basin maunsa ang baby nga naa sa akong tiyan. Gusto niya mopahuway ko permi. Unsa man akong buhaton para bisan gamay lang unta nga butang mapa-happy sad nako siya isip pasalamat sa mga sacrifice niya nako?
AVRIL
Avril,
Pasalamat ta nga nakabana ka og ing ana ka thoughtful. Maybe, mao gyud iyang pagka tawo. Ing-ana siya pagpadako sa iyang ginikanan ug usa pa nakasabot gyud na siya sa imong kahimtang.
Di man kinahanglan magpa-impress ka, Day, kay gidawat ka sa imong bana sa pagka ikaw. Simple ra kaayo ang mabuhat nimo sa imong bana ug mao ang pag appreciate sa iyang gibuhat ug pasalamat kanunay. Undang na sa pagsulti sa kadako sa imong gugma. Dili man siguro tanang lalake pero para nako ang nindot paminawon namo mao ang pag-acknowledge sa among effort. Daghang salamat.
PAPA JOE
(Sa inyong tampo ipada lang sa papajoesuperb@gmail.com)