ALCEA MANINGO
Cangyan, Carmen, Cebu
karon ka lang Godinga ka!” malagutong tuaw ni Arman nga mibutang sa telepono sa lamesita sa ilang sala. Puwerting laguta niya pagka diskubre nga nag-overprice si Goding sa suhol sa mekaniko ug sa presyo sa pisa. Bag-o lang siyang mitawag sa Roberto’s Automotive Repair Shop diin kasamtangang giayo ang tambutso sa iyang kotse. Matod ni Goding tres mil pesos ang bayranan tanan, dala na labor ug pisa. Gihatagan dayon ni Arman sa maong kantidad si Goding pagdayong adto sa talyer. Unya mil kiniyentos ra diay, sumala ni Roberto mismo nga bag-o lang gikahinabi sa telepono. Nabuko si Goding.
Nagpangusmo ug nagpangumo si Arman samtang naglingkod sa sopa sa ilang sala. Sabado sa buntag karon. Wa siya ganahing moadto sa opisina, tungod kay may ayuhunon sa muffler sa tambutso sa iyang kotse. Saba kaayog inandaran. Siya rang usa karon sa balay, kay ang iyang kapikas, si Betty, nangumpra. Nisakay lang og traysikol.
Kababata ni Arman si Goding. Manghod lang niyag tulo ka tuig tingali. Ang katalirungan gyud ni Arman mao si Gina, maguwang ni Goding. Nakapangulitawo gani si Arman kang Gina kaniadto, apan wa niya tinud-a kay na-bisi siya sa iyang pagtuon. Subra na sa napulo ka tuig nga wa sila magkita si Goding, kay mibiya si Arman sa ilang lungsod sa Sogrome pag-gradwar niyag hayiskol. CPA na si Arman ug bag-o lang naminyo pagkakita nilag usab ni Goding. Nangita og trabaho ang naulahi isip drayber ug ulitawo pa. Naatol sab nga nakapalit og second hand nga Toyota Corolla si Arman. Gipa-drayeb dayon niya ang higala.
Nag-abang og balay si Arman sa Anoos Compound sa Tayud, Liloan. Chief accountant siya sa San Sebastian Dev. Corp. nga may opisina sa Subangdako, Mandaue. Usa ka buwan pa lang nag-drayeb si Goding, daghan nag kapritso. Gusto niyang pagastuon pirme si Arman. Daghan siyag sugyot. Pailisan ang mga stud bolts sa sakyanan kay tayaon na. Pailisan ang mga nuts sa stud bolts kay tayaon na. Kon dunay ginagmay nga trouble sa sakyanan, di si Goding moadto sa suking mekaniko ni Arman. Adto gyud sa lain aron ikasabot ang mekaniko nga patungan ang presyo sa serbisyo ug materyales.
Dihang hapit na usa ka tuig ang pag-alagad ni Goding, nagduda na si Arman. Labi na kay daghang mga kababata ang misutsot niya nga magbantay anang Goding.
“Nganong si Goding man imong gihimong drayber?” ni Kulas dihang nag-abot sila sa gasolinahan usa ka higayon. Didto sa CR si Goding.
“Ngano man diay, Las?” ni Arman.
“Maru na. Daghan nang amo gibiktima niya,” ni Kulas.
“Tagaan man hinuon nakog higayon ang tawo nga magbag-o. Kon uban lay iyang nabiktima, ako dili, okey ra ko. Apan kon iya gyud kong biktimahon, di lang siya magmahay kon unsay akong mabuhat!” ni Arman.
NAKAINOM na si Goding paghiuli niya sa balay sa amo, sa oras nga hapit nang tingpaniudto. Nanimaho nang tsikos ang gininhawa. Maayo na ang tambutso sa sakyanan.
“Nahimutang na ang sakyanan sa grahe?” ni Arman.
“Oo, Dong,” ni Goding.
“Ambi lang una nang yawe,” ni Arman nga nasayod nga maayo na ang tambutso kay wa na may saba sa andar sa paggrahe.
Gitunol ni Goding ang yawe. Gidawat ni Arman.
“Niay kiniyentos pesos,” ni Arman nga mitunol og papel de banko sa drayber. “Pauli lang una sa inyo. Ipa-estambay ko lang una ang kotse, kay wa na koy ikasuweldo og drayber. Ug wa na koy badyet panggasolina,” pintok nga mga pulong ni Arman.
Nahauknol si Goding. Nagpangawot siya sa iyang ulo sa dakong kahibulong. Stay-in man siya nga pagka drayber. Naminghoy nga midawat sa kuwarta. Gikuha niya ang iyang bag ug mga gamit sa iyang lawak. Ug way tingog-tingog nga mibiya. Wa sab siya agdahag paniudto sa iyang amo.
Dili gyud diay si Arman makaako pagpangasaba og tawo. Dili siya makaako pagdagmal sa isigka tawo bisan sa pulong lamang, bisag kini sad-an pa. (KATAPUSAN)