KARONG adlawa gisaulog nato ang adlaw sa atong mga bayani. Di nalang ta maghisgut sa mga bayani nga gitudlo sa eskwelahan, Diha sa atong panimalay o sa barangay naa bay mahimong ilhon nga bayani? Ang imong papa o ang imong mama di diay sila mahimong ilhon nga bayani tungod sa sakrapisyo nga ilang gihmo pagpabarug sa inyong pamilya.
Ang inyong mga opisyales sa barangay basin naay usa o duha nga nakahimo og mga bayanihong buhat apan wa lang mahatagi og pasidungog. Ang mga basurero nga kanunaykansang panglawas kanunay nga gihulga tungod sa kabaho sa ilang trabaho. Ang mga street sweeper kansang kinabuhi nag-ungaw kanunay sa peligro tungod sa naghagiyos nga mga sakyanan sa ilang palibot.
Ang mga magtutudlo nga mas unahon pa ang paghatag og leksiyon sa mga bata bisan nagkutoy ang tiyan.
Ang usa ka bayani kinahanglan ba gyud mamatay una sa di pa ideklarar sa mga hingtungdang ahensiya? O mahimo sab nga ilhon nga bayani ang mga buhi nga nagpatulo sa ilang dugo pagpanalipod sa katawhan batok sa mga kaaway. Sama sa mga sundalo ug polis diin ang uban kanila naa pa sa tambalanan human maaangol sa engkwentro. Ang uban nagwheelchair o nagsungkod og di na makabalik sa serbisyo tungod sa dakong kadaut nga nahiaguman.
Busa kong akoy pangutan-on gawas sa mga gituboy nga bayani, nindot sab nga magsugod ta og hagpat kinsa sa mga buhi ang angayan nga pasidunggan bisan kong di na tawgon nga bayani. Ang mga lokal nga pangagamhanan mopili og mga outstanding nga empleyado matag tuig atol sa charter day o founding anniversary.
Asay maayo nga ang barangay mopili sab og iyaha og ipresentar sila atol sa founding anniversary sa barangay. Duna nay naghimo niini apan daghan pa gihapon sa mga barangay ang wa pa kahunahuna og saulog kanus-a nahimugso ang ilang barangay.
***
Pabantayan og polis ang duha ka tulay nga nagdugtong sa isla sa Mactan ug Mandaue City. Kini tungod sa daghang alarma sa hikog. Pasabot nga kong dunay mosuway og hikog agi sa duha ka tulay santaon sa mga polis nga nagbantay. O, ba kaha tungod sa presensiya sa mga wa nay mosuway sa pagpakamatay didto, Llaisonon pa ni.
Kay tuyo gyud nga magpakamatay mahimo man nga di moambak gikan sa tulay. Di ba? Dunay daghang paagi. Duna say daghang tulay dinhi sa ato.
Gumikan niini asay maayo nga butangan og ali o screen ang palibot sa tulay.
Himuon, niuban sa desinyo nga di maka guba sa nindot nga pamayhon sa duha ka tulay. Sa ingon nini nga paagi ang mga polis nga magbantay makatutuk sa lain nga assignment diin sila mahimong mapuslanon.
***
Nasuroy ko karong bag-o sa merkado sa Tabunok sa ciudad sa Talisay. Didto gipahinumduman ko sa pipila ka manindahay og isda labot sa kalihukan nga akong gi-cover unom na ka tuig ang nakalabay. May labot ni niadtong trahedya diin nagbangga ang duha ka barko sa kadagatan sa siyudad.
Matod nila ni Concepcion Abay, Edna Abines, Lynlyn Cana ug Leo Torrefil di gyud nila makalimtan ang maong trahedya kay napagan ang ilang panginabuhi. Matod nila gilangaw ang ilang tindang isda tungod sa mga estorya nga ang mga pasahero nga nangamatay gikaon sa mga isda.
Nahadlok ang mga pumapalit. Aron dasigon sila sa pagpalit ang kagamhanang lokal nagpaluto og daghang isda ug gitabangan og kaon didto mismo sa maerkado. Taudtaod sab ang kalbaryo nga ilang gipas-an, di na kini masubli pa.