NITAHO ang usa ka health maintenance organization (HMO) nga ang mga Bisaya, lakip ang mga Sugbuanon, mas menos og stress kon ikomparar sa mga Pilipino sa ubang bahin sa nasod. Ang mga researchers sa ikaduhang PhilCare Wellness Index, nga gihimo sa tibuok nasod, nagpakita nga ang mga Sugbuanon ug ang mga Bisaya, mahinanok sa pagkatug ug di magdali-dali kon intangdi sa kadaghanan sa mga Pilipino. Usahay, makaingon ta nga kanang nahinanok sa pagkatug, labi pa gyud kon kusog kaayong mohagok, wa na makainom og kape. Pero di pareho ang resulta kay dunay guwardiya sa DYRC kaniadto nga dali kaayong makatug kon makainom og kape kay lagi nainitan iyang tiyan. *** Sumala sa maong taho, nga resulta sa face to face interview sa 1,350 ka mga respondents, 300 kanila gikan sa Kabisay-an, menos ang stress sa mga Sugbuanon ug sa mga Bisaya kay kadaghanan di manigarilyo ug di moinom og ilimnong makahubog. Tungod tingali kay nimahal man ang sigarilyo nunot sa pagpahamtang sa sin tax. Ang uban maglikit na lang og gipauga nga dahon sa lumboy unya paundan og tabako. Mao ni ang ilang gitawag nga “likit morris.” Dihay akong gipangutana nganong ang iyang gitabako linikit man nga gipauga nga udlot sa nipa nga gipaundan og tabako. Matod pa niya, “Agwanta lang ko ini torni, unsaon pobre man. Kon dato pa ko, sin unta ni.” *** Sumala sa maong pagduki-duki, ang mga Sugbuanon moinom lang og duha ka botelya sa ilimnong makahubog kada semana. Wa ibutang kon ang duha ka botelya di ba kaha beer grande, Red Horse Litro o Emperador Light ba hinuon. Dunay tawo nga gibadlong sa iyang maguwang kay nagsigi na lang og inom. Matod pa sa maguwang, “Naunsa na man intawon ka, Dong. Kada gabii man ka moinom.” Tubag sa manghod, “Di manoy oy. Moinom sab ko bisag adlaw.” Si PhilCare president and chief executive officer Jaeger Tanco niingong nga ang resulta sa maong survey mahinungdanon alang sa pagtabang sa health sector sa pagmugna sa mga programa sa panglawas sa mga Pilipino. Laing pawagtang sa stress mao ang mga pasiaw.