NIABOT na og 17 ka mga sakyanan ang na-clamped sa City of Talisay Traffic Operations Development Authority (CT-TODA) sulod pa lang sa duha ka adlaw nga estriktong’ pagpatuman sa clamping ordinance sa siyudad niadtong Huwebes, Agusto 22, ug Biyernes, Agusto 23.
Sa unang adlaw sa pagpatuman sa clamping ordinance, niabot og 12 dayon ang nasampulan samtang, 15 usab ang ilang na-isyuhan lang og citation tungod sa kalapasan sa illegal parking sa duha ka adlaw.
Human nga ang mga tag-iya sa sakyanan nga nagpataka og park sa daplin sa dan ug sidewalk, ang dali ra nga nakapahawa sa ilang mga sakyanan sa dihang nakadungog sa pagpatrolya sa mga sakop sa CT-TODA, ug wala na gipaabot pa og pipila ka minuto.
Ang mga ma-clamped ang magbayad og P1,000, ang P500 niini tungod sa illegal parking, samtang ang laing P500 ang sa pagka-clamped.
Si Jonathan Tumulak, pangulo sa CT-TODA, niingon nga magpadayon ang ilang estriktong pagpatuman sa paghawan sa kadalana. (FMD)