USA ka suspek sa pagpatay sa iyang kapuyo sa siyudad sa Danao ang nasikop sa kapulisan sa siyudad sa Mandaue atol sa gipahigayon nga checkpoint.
Ang nasikop mao si Rodrigo Flores, 29, taga Barangay Suba, dakbayan sa Danao.
Matud ni Police Major Aldrin Villacampa sa Opao Police Station, dunay kasong murder sulod pa lang ning buwana ug nagtagotago gikan sa Danao police nga si Flores.
Apan walay suwerte human nasikop atol sa checkpoint sa kapulisan sa Opao sa dalan Plaridel, Barangay Looc, Mandaue niadtong Sabado, Agusto 24, alas 11:25 sa gabii.
Nasikop usab uban kaniya ang giila sa kapulisan nga carnapper sa Danao nga si Rogelio Inojales Jr., 39, minyo taga Suba sa Danao.
Ang duha ang gipara atol sa checkpoint human nabantayan nga ang motorsiklo nga gisakyan nga gimaneho ni Inojales ang gitaptapan ang plate number.
Atol sa pasusi, nakuhaan og 9mm magnum revolver si Florea ug .38 kalibre nga armas usab nakuha gikan kang Inojales.
Nakuha gikan sa duha ang tulo ka medium pack nga gidudahang’ shabu.
Ang duha ang giingong gikan sa siyudad sa Sugbo ug nagpadung sa Danao sa norte.
Dako ang pagduda sa kapulisan nga posibleng manulis ang duha o mangarnap og motorsiklo.
“Makig-alayon ta sa Danao Police station, kalabot sa mga kaso ani nilang duha, ilabi na kang Flores kay gipangita ni siya kay siya ang gitudlo nga nipatay sa iyang live-in partner,” saysay ni Villacampa sa Superbalita Cebu.
Lakip sa susihon sa Opao Police Station ang taho nga nadawat nila nga ang duha adunay koneksyon sa usa sa mga druglord nga anaa sa Mandaue City Jail.
Ang duha ang lakip sa 12 ka mga nasikop sa Opao Police station atol sa dul-an tulo ka oras nga checkpoint gikan sa alas 9:30 sa gabii Agusto 24, hangtud sa alas 12:01 sa tungang gabii, Agusto 25.
Ang laing napulo ang nakuhaan usab og mga pinakete sa gituohan nga shabu.
Matud ni Villacampa, 150 ka mga motorsiklo ang ila nasusi, diin tulo usab ang ilang na-isyuhan og citation tungod sa kalapasan sa walay helmet. (B)