MINNESOTA, USA -- General Santos City-based boxer ug undefeated “Assassin” Reymart Grande Gaballo makigbatok sa knockout specialist Yeison Vargas gikan sa Republic of Colombia.
Ang Gaballo vs Vargas nga gidalit sa Warriors Boxing, TGB ug Premier Boxing Champions (PBC) isalida sa Fox Television nga ipahigayon alas 5 sa hapon0 CST, Sabado, Agosto 31, 2019 (Dominggo, alas 6 sa buntag RP Time) sa Minneapolis Armory.
Ang 23-anyos nga sakop sa SanMan Promotions ni Jim Claude Manangquil, kinsa kanhi World Boxing Association (WBA) interim champion nga si Gaballo (21-0, 18KO) makig binukbokay ni Colombian Bantamweight King Vargas (17-1, 12KO).
Si Gaballo, kinsa nagsaulog sa ika-23 anyos nga natawhan gahapon, bag-ong gipapirmag kontrata sa TGB ang promoter ni Pinoy boxing icon Manny Pacquiao isip Promoter niini sa Amerika.
“Maningkamot jud ko aning dulaa kay mao ni akong debut fight sa PBC. dili ko makasulti nga matumba akong kontra pero akung i-sure nga on that day modaug jud ta alang sa atong nasod. Pasalamat ko sa mga tawo nga nagsuporta sa Team SanMan ug Moroteam,” matod ni Gaballo sa exclusive interview sa Superbalita Cebu via chat online.
Si Gaballo mapasalamaton sa iyang apohan, Camelo Gaballo, nga maoy nag-influence kaniya nga mahigugma sa pamoksing gikan sa iyang yutang natawhan sa Polomolok, Cotabato del Sur.
Ang Gaballo vs Vargas usa lang sa undercard sa Erislandy Lara (Cuba) vs Ramon Alvarez (Mexico) alang sa vacant WBA Super Welterweight Title. (Daniel Quindao Guden, US Correspondent)