KIBLAWAN, Davao del Sur -- Malinawong mitak-op ang pagsaulog sa "Linggo ng Kabataan" nga napuno sa nagkadaiyang aktibidad.
Gipangunahan sa mga opisyal sa Sangguniang Kabataan (SK) ang usa ka semanang kalihukan nga gisugdan niadtong Agosto 17 hangtud Agosto 25.
Sa temang "transforming education," gihimo sa mga batan-on ang nagkadaiyang aktibidad sama sa basketball, volleyball ug clean-up drive.
Misalmot sab ang Kiblawan Municipal Police Station pinaagi sa paghatag og lecture sa mga partisipante kalabot sa druga.
Ang lokal nga gobyerno mihatag sab og symposium kalabot sa human immunodeficiency virus (HIV) aron makatabang ang mga batan-on sa kampanya niini ug malikay sila sa maong sakit.
Sagad sa mga matakbuyan sa HIV mao ang mga batan-on nga sayong mosulod sa pakighilawas ni bisan kinsa.
Gidasig sab sa kapulisan ang mga batan-on nga suportahan ang kampanya batok sa terorismo.
Sa silingang lungsod sa Malalag, gipangunahan ni Police Captain Edilberto Cabillo, officer-in-charge, ang paglusad sa Kabataan Kontra Druga at Terorismo kung diin nakig-alayon ang kapulisan sa mga opisyal sa SK aron mahimong malampuson ang kampanya.
Sumala ni Cabillo, mahinungdanon ang partisipasyon sa mga batan-on alang sa implementasyon sa kahapsay'g kalinaw sa komunidad.
Pinaagi sa programa, malikayan sab ang pagtukod og mga grupo o gang sa mga batan-on nga hayan magdala og kasamok sa publiko. (Orlando B. Dinoy)