SUPERBALITA CEBU

Editoryal: Hadla lang sa publiko

Editorial cartoon by Ariel Itumay

DAGHAN ang napugwat sa dihang nabaniog sa niaging semana ang balita nga mahimong makagawas ang konbiktado sa kasong pagpanglugos ug pagpatay nga si kanhi mayor Antonio Sanchez sa Calauan, Laguna.

Si Sanchez nagkonbikto niadtong 1995 tungod sa iyang pagpanglugos sa usa ka estudiyante sa University of the Philippines Los Banos nga si Mary Eileen Sarmenta ug ingon man sa pagpatay sa uyab niini nga si Allan Gomez niadtong 1993.

Nasentensiyaan siya og pito ka reclusion perpetua o 40 ka tuig sa pagkapriso tungod sa brutal nga krimen nga iyang nahimo.

Apan human sa 25 ka tuig nga pagserbisyo sa bilanggoan, nitumaw ang hugonhugon nga ang mayor mabuhian og sayo tungod sa Republic Act 10592 kon gitawag og good conduct time allowance (GCTA).

Ang maong balaodnon nagdugang og mga adlaw sa pagkunhod sa sentensiya niadtong mga piniriso nga adunay maayong binuhatan.

Ang Department of Justice, pinaagi ni secretary Menardo Guevarra, niadtong Agusto 21, mao mismo ang mianunsiyo nga hayan usa si Sanchez sa 11,000 ka mga piniriso nga makapahimulos sa RA 10592, base sa ilang computation.

Si Senador Ronald “Bato” dela Rosa, kanhi hepe sa Bureau of Correction, misuporta usab niini pero dali kining mibakwi sa dihang giataki og mga negatibong komento sa mga netizens.

Mao usab kini ang sentimento nila ni Presidential spokesman Salvador Panelo kinsa maoy abogado ni Sanchez sa maong krimen ug ang hepe sa Bureau of Correction (BuCor) nga si General Nicanor Faeldon.

Pero sa dihang midahunog ang reklamo sa publiko nga gi-abayan sa pagsupak usab ni Presidente Rodrigo Duterte, hilom pa sa tubig sa linaw ang mga nalakbitan sa unahan.

Timaan nga posibling ila lang gisuwayan ug gihadla ang publiko.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph