GIHANGYO kadtong maapektohan sa scheduled repair nga mga konsumidor sa Metropolitan Cebu Water District (MCWD) nga magpundo daan tungod kay 12 ka oras nga walay agas sa pipila ka parte sa dakbayan sa Sugbo ug Talisay.
Ang 12 ka oras nga walay agas mahitabo ugma, Miyerkules, Agusto 28, tungod kay ang 700-millimeter-diameter transmission pipe sa Pleasant Homes sa Labangon ayuhon sugod alas 7:00 sa buntag hangtod alas 7:00 sa gabii karong Miyerkules.
Lakip sa apektado ang parte sa Gorordo Ave., Gen. Maxilom Ave. MJ Cuenco Ave., Mabolo, pier area, Labangon, Banawa, Mambaling, Basak, Kinasang-an, Pardo, Quiot ug Talisay City.
Matod sa tigpamaba sa MCWD, Charmaine Rodriguez-Kara, nga duha ka semana na ang nakalabay dihang nasayran nila ang leak sa maong dapit.
Nipasabot si Kara nga molungtad sa 12 ka oras ang repair lakip na ang pagkawot niini tungod kay ang maong tubo nagdala kini og liboan ka galon sa tubig matag oras.
“A leak repair includes welding or replacing the damaged portion of the pipe,” dason ni Kara.
Gawas sa pagsigurado nga dili masayang ang tubig sa leak nga tubo, nipasalig usab ang MCWD nga ang maong repair makapausabaw kini sa supply ug pressure sa tubig sa mga dapit nga giserbisyohan.
“Under MCWD’s Water Safety Plan, leaks need to be repaired immediately to prevent any contamination...” tipik sa ilahang press release sa MCWD. (PR)