MOKABAT ngadto sa kapin P2 milyones nga balor sa gituohang shabu ang nasakmit sa managlahing buy bust operation sa dakbayan sa Sugbo niadtong Lunes sa gabii, Agosto 26, ug pagkakadlawon sa Martes, Agosto 27.
Ang unang operation gipahigayon sa Barangay Duljo-Fatima diin nadakpan ang usa ka Nelson Booc, 33.
Nakuha gikan kang Booc ang giingong shabu nga gibanabanang nagkantidad og P1.7 milyones.
Si Duljo Barangay Captain Elmer Abella mibutyag nga si Booc nalakip sa ilang drug watch list isip usa sa mamaligyaay og ilegal nga drugas.
Samtang sa laing operation, laing gituohang shabu nga nagkantidad og dul-an sa P1 milyon ang nakuha sa sityo Lahing-lahing, Barangay Mabolo, pasado alas 12 sa tungang gabii.
Nasikop sa Mabolo Police si Robert Solon, kinsa nakuhaan sa iyang posesyon og 140 gramos nga illegal drugs.
Ang duha nga anaa karon sa kamot sa mga tinugyanan sa balaod ang mag-atubang og kasong paglapas sa Comprehensive Dangerous Drugs Act of 2002. (Benjie B. Talisic)