ORMOC CITY, Leyte -- Midominar sa duha ka Tennis Tournament ang Ormoc Tennis Academy sayo ning buwana sa Baybay City ug Calbayog City sa Samar.
Duha sa mga players ang nahimo nga Most Valuable Player (MVP) sa torneyo.
Sa duwa sa Baybay City, Leyte niadtong Agusto 11, 2019, sa siyam ka kategorya, unom niini ang nahimong kampyeon ang Ormoc Tennis Academy.
Sa maong duwa, nahimong MVP ang 14 anyos nga si Mia Gemida.
Sa duwa sa Calbayog City sa Samar, sa siyam gihapon ka kategorya, unom niini diin nahimong kampyeon ang Ormoc.
Gideklara nga MVP ang 16 anyos nga si Cedric Bravo.
Gipasigarbo ni coach Richie Bacalso ang iyang mga players nga karon duna nay mga titulo sa Pilipinas sa duwa nga tennis.
Sama nalang sa 10 anyos nga si Christian Laguna nga ika number 6 sa Unisex Category lukop nasud.
Naa usab ang 14 anyos nga si Gerlad Gimeda nga gi-sponsoran karon sa sikat nga British sporting goods company.
Duha ka magsuon ang giila karon nga fast rising players nga mao ang Brodeth siblings nga sila si Kenzo ug Kimi.
Si coach Bacalso dunay 50 ka players ug sagad niini gikan sa mga kabus nga pamilya apan dunay potensiyal sa tennis.
Si Bacalso kanhi usa ka bank manager apan ni resign. Nakaagi og tumang kalisud maong nanimpad sa Manila. Naabot sa Mindanao ug nibiyahe na usab sa Ormoc.
Si Bacalso naila nga usa ka star player sa basketball apan nagsugod ang iyang karera sa tennis sa dihang naabot sa Mindanao.
Sa iyang pag abot sa Ormoc niadtong 2012, iyang nakita sa matag duwa sa mga bata sa tennis tournament, permi kini mapildi.
Dunay usa ka negusyo si Bacalso ug ang kita niya iyang gigahin alang sa pagtabang sa mga bata pinaagi sa tennis.
"Ako gyod gisaad sa Ginoo nga di nako sayangon ang higayon nga gihatag ug ang kwarta mao nga ako ni gitabang sa mga bata.
Libre gyod ni tanan. Basta maniguro lang sila unya disiplinado. Kaysa sa akong ilaag-laag ang kwarta, maypa akong itabang," matod ni Bacalso.
Gisugilon ni Bacalso nga dili sayon ang ilang naagian sa pagsugod sa tennis academy.
Dunay mga higayon nga sa pag apil nila sa torneyo, sayo pa lang gani ma-eliminate na ang Ormoc Tennis Academy.
Dugang ni Bacalso nga wa lang gyod sila mawad-i sa paglaum hangtud niabot ang panahon nga permi na sila mokampyeon.
(JKDP)