TINGUHA ni National Coach Yeng Guiao nga di pa hingpit buhian ang gipangtaktak gikan sa Gilas Pilipinas 12-man roster kon mobiya na ang tim padulong sa Fiba World Cup.
Gibutyag sa national coach nga iyang gi-endosar nga kadtong napakyas nga mapili sa Gilas lineup moapil sa tim sa biyahe ngadto sa Foshan, China alang sa Agosto 31 hangtud Septyembre 15 nga tigi.
Si Beau Belga ug mga naangol nga magduduwa nga sila si Matthew Wright, Poy Erram, ug Marcio Lassiter maoy mga final members sa Gilas pool nga napakyas nga mapilian sa tim.
"I recommended that isama yung pool for the effort that they put in, for the support that they put in," tin-aw ni Guiao niadtong Dominggo human pormal nga gisumite ang Gilas lineup ngadto sa Samahang Basketbol ng Pilipinas (SBP).
"Hindi ko alam kung maaaprubahan yun or may budget for that."
Human nga nigamay sila tungod sa mga angol, sila si Erram ug Wright pulos gipailawom sa dakong konsiderasyon nga malakip sa World Cup team.
Ang duruha, apil si Belga, nikuyog uban sa tim ngadto sa Spain alang sa ilang 10-adlaw nga training camp.
Si Wright kinahanglan nga nakigtigi kang Mark Barroca alang sa ika-12 ug katapusang luna sa tim ilabi na nga nagmaayo ang iyang kahimtang human nakasinati og nakilo ang bukong-bukong (ankle) niadtong nilabay nga semana.
"Nag-factor din diyan yung health ng mga players, nag-factor din diyan yung cohesion that they provide with the rest of the team," matud ni Guiao sa mga factors nga niabot samtang gipili ang Final 12.
"Mahirap actually. Ilang araw na namin pinag-uusapan yan. Of course there were also circumstances that played into the decision making."
Sa pikas bahin, posible matud pa nga mahimong dakong hulga sa title defense sa Team USA sa nagsingabot FIBA World Cup ang usa pa ka powerhouse team nga Serbia.
Sumala sa mga tigpaniid, di pa wala pa makatilaw og pilid ang world No. 4 sa giapilan nila nga mga exhibition games kon diin ilang napaluhod ang Lithuania, Italy, ug Greece nga gipangulohan ni 2019 NBA MVP Giannis Antetokounmpo.
Tungod niini, nisaka ang Serbia sa pinakatumoy sa World Cup Power Rankings, ug sunod lang kanila ang Team USA nga napukan sa Australia sa usa ka tune-up game bag-ohay lang.
Gilauamn sab nga ibandera sa Serbia ang giilang triumvirate sa mga big men nga gilangkuban nila Nikola Jokic sa Denver Nuggets, Boban Marjanovic sa Philadelphia 76ers ug Nemanja Bjelica (Biyelitsa) sa Sacramento Kings.
Gawas kanila, mahimo sab nga bala sa Serbia sila Bogdan Bogdanovic (Kings), Marko Guduric, 7-footer Miroslav Raduljica, ug uban pa.
Kabahin niini, gisulti ni Gilas Pilipinas head coach Yeng Guiao sa paghinabi sa Bombo Radyo nga gilauman na matud pa nila nga mas lisud ang paghagit nila sa Serbia sa Septyembre 2 nga kabahin sa group phase sa torneyo.
Dugang ni Guiao, segurado matud pa nga mas lisud pa ang mahimong pagpakigtigi nila sa Serbia itandi sa usa pa ka powerhouse team nga Italy.
Apan bisan pa niini, gipahimug-atan ni Guiao nga atubangon nila ang Serbia bisan og di pabor kanila ang kahimtang.
"Mas mahirap ang laban [sa Serbia], pero we will adopt the same attitude, ika nga," paneguro ni Guiao.
"Pagpunta natin [sa Foshan, China] at 'pag kalaban natin sila, kailangan makipagsabayan din tayo at maniwala rin tayo na kaya rin nating madisgrasya ang Serbia," dugang niya.