NAHINUMDOM ko nga niadtong Agosto 2 ning tuiga, napatik sa mantalaan nga ang Police Regional Office-Davao nakapakasaka na og 26 ka mga kaso batok sa nagpaluyo sa investment schemes nga gidudahan nga scams.
Suma ni Major Jason Baria, tigpamaba sa kapulisan sa Rehiyon sa Davao, kadaghanan kanila gikiha tungod kay napakyas pag-uli sa kwarta sa mga investors.
Subay sa balita, unom ka mga tawo nagreklamo sa walo ka mga opisyal sa Asia Business Corporation kun RDFLEX Trading/Marketing (ABC-RD).
Sa Davao del Norte, dunay 56 ka mga tawo ang nagreklamo batok sa siyam ka mga kompanya sama sa Enterprise Company, Questlink Digitial Marketing, Titan 29 Marketing, BCT Marketing and Car Trading, A 21 Marketing, Jogle Innovative Marketing, LK638 Marketing, Omega and Dreamzion Beauty and Health Hub.
Ang kaso large scale and syndicated estafa, kalapasan sa Batas Pambansa Blg. 22 ug Article 315 sa Revised Penal Code may relasyon sa Presidential Decree 1689 tungod sa giingon nga pagpadagan og investment scams sa rehiyon.
Gipasiatab sab ni PRO-Davao Director Marcelo Morales modaghan pa ang moreklamo sa kapulisan, apan unsa na may nahitabo sa ilang kaso?
Niadtong miaging semana, gipahibalo ako sa usa sa akong mga kauban sa trabaho nga nasakpan sa mga investors ang tag-iya sa Jogle Innovative Marketing dinhi sa siyudad sa Davao.
Suma pa niya, dunay mga tawo nga mikustodiya niya aron di makaikyas ug maseguro nga mauli niya ang salapi sa mga investors.
Kay nagtuo lagi akong amigo nga naa tay koneksyon sa kapulisan, nihangyo siya nga mangutana ako kung duna na bay warrant of arrest si Glenn Oliveros Pañarez, CEO sa Jogle. Siya nakaikyas sa otoridad didto sa Patin-ay, Agusan del Sur, diin lima sa iyang mga kauban ang nasikop.
Tuod man, akong gituman iyang hangyo mao nga akong gi-chat akong higala nga opisyal sa Criminal Investigation and Detection Group (CIDG)-Davao.
Sa iyang tubag, ila pang subayon kung naa bay kaso nga napasaka sa korte ug naa nay warrant of arrest para makalihuk ang otoridad.
Apan, tungod seguro kay okupado sila sa mga bulutahon, wa na siya nakahatag nako og balita kung unsa nay nahitabo sa kaso?
Sa nahitabo karon nga hinay kaayo ang kaso, natahap hinuon ako nga di molihuk ang otoridad tungod kay sulti pa sa akong kasaligang tinubdan, kadaghanan nila mga investors. Ug basin hilum lang sila kay nabawi na ilang investments?