DAVAO DEL SUR -- Giawhag sa Commission on Elections (Comelec) sa probinsiya ang tanang botante nga di na huwaton ang pagtak-op sa rehistrasyon ilabi na sa mga wa pa marehistro.
Si abogada Jennifer Ancla, provincial election officer, miingon nga mas maayong karon pa lang motuman na ang mga botante sa pagparehistro aron malikayan ang pagdasok inig tak-op niini sa katapusang adlaw sa Septyembre.
Ang rehistrasyon kabahin sa pagpangandam ugaling mahinayon o dili ang 2020 Barangay ug Sangguniang Kabataan Elections.
Matud sa Comelec nga aduna sab silay mga satellite registration sa mga barangay diin pagadawaton ang mga bag-ong botante ug uban aktibidad nga may kalabutan sa usa ka botante.
Gipasabot ni Ancla nga gawas sa rehistrasyon, mahimo sab dawaton ang pag-usab sa registration record, pag-usab sa mga sayop nga datos, pag-reactivate ug uban pang may kalabutan sa piliay.
Si Ancla naghangyo sa publiko nga pahimuslan ang higayon mao nga aduna sab silay mga ginahimong satellite registration sa ubang tunghaan ug mall aron mas sayon nga mahatud ang serbisyo sa Comelec subay sa Resolution 10549.
Gipasabot sa Comelec nga katungod sa matag Pilipino ang magpa-rehistro isip botante gikan 15-anyos alang sa SK ug ubos niini sa dili pa motungtong sa maong edad una moabot ang Mayo 11, 2020 ug unom ka bulan nang nanimuyo sa barangay sa di pa moabot ang adlaw sa eleksiyon.
Mga makaapil sa SK elections, mao ang mga nag-edad og 15 hangtud 30-anyos aron sila makaboto.
Hinuon, wa nay labot sa rehistrasyon ang mga nakaboto sa Mayo 13, 2019 mid-term elections. (Orlando B. Dinoy)