Todino: Kagawasan ni Sanchez



ANG Republic Act 10592 naghatag og higayon sa mga piniriso nga mahatagan sa ilang kagawasan tungod sa ilang gipakita nga “good conduct” samtang nagserbisyo sa ilang sentensiya.

Tungod sa maong balaod, gipaabot nga daghang mga piniriso ang kwalipikado ug mahimong gawasnon na unya.

Gilalisan pa karon kon apil ba niini si kanhi Mayor Antonio Sanchez sa Calauan, Laguna kinsa nakonbikto sa pagpanglugos ug patay niadtong 1993.

Nagbaniog ang sentimento pagsupak nga hatagan og kagawasan si Sanchez. Dili madawat sa mga tawo, nga hatagan og ika-duhang higayon si Sanchez magbag-o sa iyang kinabuhi.

Dinhi nato makita ang dakong kalainan sa tawhanon ug kalibutanong pagbati kon itandi nato sa pagbati nga giimpluwensiya sa balaang espiritu.

Mao bitaw gipasantop sa mensahi ni Hesu-Kristo nga higugmaon nato atong kaaway.

Kitang tanan pulos makasasala. Dako man o gamay atong salaod, sa atubangan sa Dios sala gyud na siya. Ang silot sa sala mao ang kamatayon.

Samtang nanambal ug naghatag og panalangin si Hesu-Kristo, wa siya magpili kon kinsa ang iyang tabangan. Wala sab siya mohatag og kondisiyon niadtong gusto moduol kaniya.

Lahi karong panahona, usahay mopakita ta og kaayo sa tawo nga makahatag nato og kaayohan. Mohatag ta apan dunay mga kondisiyon.

Ang mga binilanggo sama ni Sanchez tunok na sila sa panan-aw sa kadaghanan. Apan, sa mata sa Dios, ang tanang nilalang pulos bahandi alang kaniya, hinungdan nga iya kining gipakamatyan aron maluwas gikan sa kasal-anan.

Pagawson man o dili si Sanchez sa prisohan, atong bag-ohon ang pagtratar nato sa mga tawo, labi na niadtong naa sa bilanggoan.

Kay bisan unsa pa ka pula sa imong sala, kon moduol ka sa Dios iya kanang himoong maputi sama sa niebe. Kitang tanan masipyat ug makasala, walay exempted.

Apan, ang bentaha lang mao nga makapangayo ta’g pasaylo sa Dios ug magbag-o sa atong kinabuhi. Di nato matugkad ang kasingkasing ni Sanchez kon nagbag-o na siya.

Basin baya, mas hugaw pa ang kasingkasing niadtong nagsinggit nga ipadugta si Sanchez sa prisohan.

Busa tugotan nato nga ipadagan ang proseso sa balaod. Ipatigbabaw ang husto, makiangayon ug makatarunganon. Kon aduna may bikil diha sa balaod, timan-i naa ang Dios nagtan-aw aron paghatag sa hustisiya.

Related Stories

No stories found.
SunStar Publishing Inc.
www.sunstar.com.ph