WALA nay pasayluon ang mga masapon nga maglabay og basura atol sa Higalaay Street Parade and Floats Miyerkules, Agosto 28, nga ipahigayon mga alas 7 sa buntag gikan sa Rodelsa circle paingon sa Limketkai, dakbayan sa Cagayan de Oro.
Gibutyag ni Engr. Armen Cuenca, tsirman sa City Local Environment and Natural Resource Office (Clenro) nga usa ka tuig na nila kining gipahibalo. Kahinumduman nga niadtong niaging kapistahan igo lamang sila nga nagbadlong sa mga masapon nga maglabay og mga basura sa bisan asang dapit.
Sa pakighinabi sa SunStar Superbalita kang Cuenca, gibutyag niini nga karong panahona mag-isyu na sila og mga ordinance violation receipt.
“Ato gyud dakpon, wala na tay pasayloon kay tuig naman, last year nag announce naman ta ani, sa mga radio, sa inyo sa print,” matud ni Cuenca.
Gani duna nay nasampolan nga gi-isyuhan og ordinance violation receipt atol sa Higalaay Carnival Street Dance Competition.
Giingong empleyado kini sa usa sa mga dakong hotel sa siyudad kinsa nigawas lang sa iyang gitrabahoan ug nanan-aw apan nasapong naglabay sa iyang gikaon nga ice candy wrapper.
Nangayo kini og pasaylo tungod kay giingong nakalimot lang apan gi-isyuhan na kini og resibo aron na usab nga makitang duna nay ngipon ang maong balaod ug mapakita kung unsa ang tinuod nga tumong niini ilabi na nga alang lang gihapon kini sa kaayohan sa tanan.
Naghangyo usab si Cuenca sa katawhan nga batunan ang insaktong disiplina sa matag-usa.
“Hangyo lang ta atong batunan ang insakto nga disiplina asa ibutang ang basura kay mao lage na di nato malikayan ang pagbara sa atong kabal kung kita mag contribute pinaagi sa basura kung ilabay nato bisag asa,” dugang pa.
Nasayran usab nga susama kaniadto dunay libreng tubig apan kinahanglan lang nga magdala og mga sudlanan o magpalit og sudlanan sa happy earth nga kapartner niini tungod kay tumong lamang nga ang kampanya diha sa paglimita sa paggamit og mga plastic bottle.