NAANDAN na ni Senator Christopher “Bong” Go nga kung adunay mga masunogan sa lain-laing dapit sa nasod sa Pilipinas iya kining personal nga hatdan og hinabang ug lingawon aron maubsan ang kaguol nga gibati sa nawad-an og panimalay ug kabtangan.
Niadtong adlawng Biyernes personal nga midangat ning dakbayan sa Cagayan de Oro si Senator Go ug miapod-apod ug tabang ngadto sa mga nasunogan ning bag-o sa mga barangay Puntod ug Lapasan kon asa gipahigayon kini sa covered court sa Corrales Elementary School.
Matud ni Go nga gamay lamang nga kantidad ang iyang dala apan makatabang na kini ngadto sa mokabat 430 kapin ka mga indibidwal.
Dinhi sab iyang gimandoan ang Department of Social Welfare and Development (DSWD) nga dili pasagdan sa ayuda ug panginahanglan ang mga biktima, ang National Housing Authority nga iprayoridad nga maka avail sa housing ang mga biktima, gimando sab niini ang Department of Health nga atimanon ang panglawas, and Tesda nga gitahasan niining ipaubos sa skills ug livelihood training ang mga nasunogan.
Dinhi sab niini gipahibalo ang maayong balita nga gawas sa gitukod nga malasakit center sa Northern Mindanao Medical Center (NMMC) gitakda usab kining motukod sa JR Borja Hospital ning siyudad.
Gibutyag sab niini nga aduna sab siya gihingusgan nga diha sa mga balay tambalanan aduna gyod priority lane ang mga senior citizen ug person with disability.
Sa wala pa usab kini nibisita sa siyudad unang gibisitahan niini ang mga nasunogan sa lungsod sa Initao Misamis Oriental.
Taliwala sa halos upat ka oras nga pagkalangan ni Go nakahatag lingaw ug napakatawa gihapon niini ang mga nasunogang Kagayanon ug misamot ang kalipay nga milantaw dihang personal nilang nasaksihan ilang mga idolong action star nga si Robin Padilla ug Phillip Salvador nga diha lang nila sa telibisyon nakita.